Pengawa pemansang seruran nyadi agenda dikena nangkup pinta komuniti
SARIKEI: Peminta raban bansa enggau pengawa pemansang seruran dipejalai lalu nyadi agenda besai dikena nangkup peminta bala komuniti, ku Kaban Kunsil Nengeri ( AUN) Repok, Datto Sri Huang Tiong Sii.
Iya madahka diri sedar ngelama tu bala komuniti kelebih agi ba menua pesisir agi jauh tinggal enti dibida enggau komuniti ba kandang mengeri, kelebih agi bekaul enggau perengka guna infrstruktur ti mungkur jalai alun ti meruan, bekal kuasa karan, bekal ai beresi enggau penyikap perengka guna pemun bukai.
Nya alai, raban kitai udah meri pemerat lebih agi ba pemansang ti bekaul enggau pekara tu.
“Kitai udah gawa ngemanah enggau nyeleti semua perengka guna ti bisi ngambika semua peminta enggau peneka bala komuniti ulih ditangkup sereta dikeamat.
“Berindik ari nya, kitai mega minta bala komuniti meri kerejasama enggau sukung ngagai raban kitai ba pengawa nyapai juluk tu,” ku iya madah ngagai media pengudah tembu atur pejalai ngabas sekeda palan projek ti ngaul agih belanja diberi perintah nengeri ditu, kemari.
Nitih ku Huang, fokus agih belanja taun tu lebih agi dikena nyeleti enggau ngemanah perengka guna infrastruktur bal sekula, rumah panjai enggau mega genturung pendiau.
“Berebak enggau nya, kitai mega bisi ngagihka belanja besai ngagai sepital ditu, dikena ngulihka kereban perubat, pulaika pemaik ngagai bala komuniti.
“Diatu kitai benung bebendar gawa nentuka bala komuniti ba DUN Repok ulih ngasaika pemansang ti seruran dipejalai.
“Pengawa tu beguna amat ngambika bala komuniti ditu enda tinggal ari arus pemansang ti udah dianti sida ngelama tu,” ku iya nambah.
Sama bisi datai Chairman Kaunsil Pelilih Sarikei (MDS), Wong Zee Ying, pengari Opis Kereja Raya Bagi Menua Sarikei sereta mega bala ketuai komuniti menua nya.