Jamit bisi nyereta pengawa nugal ba Sungai Belawai, Batang Rajang
KAPIT: Kaban Kunsil Nengeri ( ADUN) Bukit Goram Jefferson Jamit ngulu pengawa sida ti bumai bukit ari Sungai Belawai, Batang Rajang ditu nugal tauka ngelabuh pun kena pagi hari minggu tu tadi.
Idar bumai padi bukit – pengudah Gawai diintu, suah agi bulan Julai, sida ti bumai deka berengkah ngiga tanah endur bumai, suah agi tanah kampung. Tu dientudika pengawa nasau tauka ngebak, muai urat kayu dalam tanah, udah nyadi pengawa nunu ba ujung bulan Ogos tauka September bepanggai ba gaya hari. Pengudah nunu, pengawa betanamka ensabi ti tau tumbuh galak sereta jampat diketau. Pengawa ngerachun dikena munuh rumput. Datai ba pengawa nugal lalu tiga bulan udah nya, dalam bulan Januari tauka Febuari musim ngetau.
Tegalan diempu Penghulu Pasang Tubak. Nentuka nugal enggau menih jampat tembu, nengah pengawa beripai, urung 50 iku peranak, indu enggau lelaki datai ari 10 buah rumah panjai sepanjai Sungai Belawai ngambi bagi ba pengawa ngelabuh pun.
Sida ti bisi datai nyaup iya nya Tuai Rumah Rengga, Tuai Rumah Madau, Tuai Rumah Marong, Tuai Rumah Nuga, Tuai Rumah Liang, Tuai Rumah Jambun enggau Tuai Rumah Lugom sereta nembiak redak ke bukai.
Sida lelaki ngena tugal belian nugal lubang padi, dientudi sida ke indu menih lalu ngalitka lubang tugal ngena tanah dikena nyeliahka burung pipit makai benih padi.
Tentu mega tulang lelak ngereja, niki nurun tebiang, mesti landik ngimbang tubuh sereta mandi peluh di baruh panchar mata panas.
Dikenang ngenang sida ti datai nyaup iya, pengempu tegalan, Penghulu Pasang Tubak nyendiaka pemakai asi ruas enggau pansuh ikan lebuh ngetu merarau, belelak mulaika sepuh sebedau nampung pengawa nugal muakka lemai.
Meda penatai Jamit ngasuh sekeda sida tekenyit, ti benung kiruh nugal enggau menih tegalan. Udah nya, sida begempuru ngambat penatai Jamit laban sida nadai ngadang pengari rayat deka nurun kumai begulai enggau sida nugal.
Lebuh dirandau, Pasang meri tabi puji ngagai Jamit ti udah nurun gawa ngagai renggat baru ba sitak menua dipegai iya.
“Dulu ari tu, aku kala madah ngagai iya (Jamit), kami kiruh ba umai laban deka nugal lalu udah netapka hari bulan nugal kena 6 Oktober. Tanah umai udah diberekat ngena piring nitihka adat lama bansa Iban, besampi minta diri mujur bumai sereta bulih padi.
“Kami sebuat berasai lantang ati meda iya datai ngulu pengawa kami. Pengawa bumai tu nyadika aktiviti betanam kami. Kami nanam padi diri laban enggai meli berau ari pasar.
“Penatai Jamit meri peransang besai ngagai kami. Iya semak enggau kami, lalu kami udah bumai kenyau ari mit lalu tu keterubah pengari rayat begulai enggau kami. Iya tu chukup kemerah,” ku Pasang muji.
Lebuh dirandau pengarang berita, Jamit madah, nyadi bansa Iban, iya nemu silik idar pengawa bumai padi bukit.
Iya meri puji ngagai semengat beduruk gawa ngagai sida ti bumai.
“Semengat gawa beduruk endang nyata diayanka raban bumai. Sekali tu, 10 buah rumah panjai datai bebala mayuh nyaup Pasang nugal. Udah tu, ba tegalan umai sida ti bukai.
“Semengat tu mesti diterenak ngagai rayat ngambika nerenak kereja siti tim enggau kerejasama. Uji perati, sebidang tanah besai, enti siti pintu bilik aja gawa nengali, deka begunaka beberapa endur tembu. Tang nengah pengawa beduruk, iya ulih disadang tembu dalam sehari aja.
“Baka nya mega pengawa nasau, nunu, nugal enggau ngetau, bela bekunsika pemerat pengawa. Aku muji amat Pasang ulih ngempung mayuh bala datai mantu iya. Aku ngarapka bala bukai meda deka nunda pengawa Pasang,” ku Jamit muji.