DAP ngining deka minta pilih ba 29 penuduk maya PRN12

MIRI: Parti Tindakan Demokratik (DAP) ngining deka minta pilih ba 29 penuduk maya Pengawa Bepilih Nengeri ke- 12 ( PRN12) nyengkaum Senadin, Piasau, Pujut enggau Bukit Kota adap Utara Sarawak.

Sekretari DAP Sarawak, Senator Alan Ling Sie Kiong madahka parti nya udah bisi ba Sarawak kenyau ari 40 taun ke udah, dalam taun 1978, lalu sida datai ari pupu bansa sereta negika pengawa ungkup semua bansa, parti nya dipeleba ngerembaika sayap sida ba mayuh agi penuduk.

“Semua bala kita patut nyendiaka napi pengawa bepilih nengeri laban kitai udah sedia ngerampas semua, semua kita nyadi kereban beguna amat ngagai Pakatan Harapan (PH) menang ba penuduk menua pesisir nengeri,” ku Alan madah rambau Aum Besai Keterubah DAP Ulu Niah, ujung minggu tu tadi.

Nitih ku Alan, iya ngasak semua kaban bekenaka pelasar nyaup komuniti menua tu ngatur mayuh agi program dikena ngerembaika polisi Perintah Besai PH.

Iya nyemetak madahka pemesai guna bala kaban DAP ngetanka disiplin sereta ngemaruhka diri maya gawaka rayat laban DAP iya nya parti ari rayat lalu ungkup rayat.

Ba jaku dipansutka iya, iya ngingatka raban renggat baruh nyikap diri empu ngena penemu sereta ngemai pemanah nama gawaka bala rayat.

“Aku muji bala kaban ti sama gawa ditu ti puh gawa sereta meruan enggau pengawa ditegika DAP, nadai nadai entu nyenggala ditumbuh, tang sida tu bekereja baka orang bukai, mantu parti bejalaika pengawa ba menua pesisir,” ku iya nandu.

Ku iya, perintah PH keran ba pengawa ngemaruka institusyen dikena ngemunaska penyalah makai suap enggau karenah birokrasyen, sereta pampang Ulu Niah tebal agi datai ari kaban bansa Dayak nyata ngayanka DAP diterima bansa Dayak ba Sarawak.

Ling ti mega Kunsil Direktor Sawit Malaysia madahka pampang DAP udah tu deka diidupka baru iya nya Limbang ti enda entu chakah gawa lalu sebuah pampang baru deka ditumbuh ba Lawas.

Senator Alan Ling ti nyadi Sekretari DAP enggau Sekretari PH Sarawak nguluka pengawa baum ke bela digulu bala kaban DAP ba Niah.