Sarawak Workers Party nemu pengawa piak ti ngeluarka PL dikena meri pemendar ngagai kompeni ngereja kampung di nengeri tu
SIBU: Parti politik ti bekuasa di nengeri tu enda patut majakka ulah beambi ulih ari penuduk sida ngulihka belanja politik ari pengawa ti salah enti deka meda sistem demokrasi mai pemaik ngagai rayat.
Presiden Sarawak Workers Party (SWP) Munan Laja madahka sida nemu pengawa parti- parti ti megai kuasa ngeluarka Provisional Lease (PL) dikena meri pemendar ngagai kompeni ngereja kampung ba mayuh menua di nengeri tu.
“Pengawa beambi ulih ari kuasa tu endang lama udah nyadi nyentuk ke diatu.
“Kitai nemu semua parti bekenaka belanja bejalaika politik ba menua demokrasi tang mesti ngena chara ke betul baka ni ngiga belanja politik.
“Baka ke udah, parti ti bekuasa meri konsesi kayu ngagai kompeni dikena malas belanja politik ke udah diberi ngagai parti sida.
“Semua tu patut diperatika kitai ngambika dua-dua parti sama bela,” pia ku iya madah ngagai pengarang berita, kemari.
Munan madah, pekara nya ngujungka mayuh chalun ari parti penyakal enda lantang ati laban alah bediri ketegal enda chukup belanja maya bekimpin ngulihka undi rayat.
Ku iya, parti penyakal endang nadai chara muntang ngiga belanja politik.
“Ambika banding, enti chalun parti penyakal ngena belanja bekimpin RM20,000 tang ke ngelaban iya bisi belanja RM300,000, iya endang sigi alah.
“Nya alai, SWP andal siti chara patut ditumbuhka dikena nyeliah pekara tu majak nyadi enti kitai enggai meda reti demokrasi semina nyadi nama aja tang enda dipejalai enggau chara ti betul,” ku iya madah baru.
Munan mega madah, perintah ke manah patut bisi chara ke manah.
“SWP deka meda pekara tu enda nyadi agi ba ubah politik maya hari tu,” pia ku iya.
Kitai nemu semua parti bekenaka belanja bejalaika politik ba menua demokrasi tang mesti ngena chara ke betul baka ni ngiga belanja politik. Munan Laja Presiden SWP