Ketuai Pampang PKR Julau patut diarika peranak asal
JULAU: Penuduk nyadi Ketuai Pampang Parti Keadilan Rakyat (PKR) Julau patut dipilih ari orang ke endang peranak pelilih nya empu dikena nentuka parti nya mujur bejalaika tanggung pengawa ngagai rayat.
Ketuai Publisiti PKR Julau, Jimmy Manju madah, dua iku chalun deka bediri maya pengawa bepilih renggat parti sida ke diatur kena 4 November ti deka datai besemekih megai penuduk nyadi ketuai.
“Kami di Julau ngarapka penuduk nyadi ketuai pampang PKR Julau ila dipilih ari peranak menua tu empu.
“Kebuah pia, peranak menua tu empu lebih agi nyemetak nemu nama ke nyadi di Julau enti dibida enggau peranak menua bukai ti nganjung nama diri deka dipilih nyadi chalun ketuai,” pia ku iya madah maya berandau enggau pengarang berita, kemari.
Pengawa bepilih komiti PKR Pampang Julau diberitaka bisi ‘angat’ laban mayuh raban parti dia enda lantang ati meda siku chalun menua luar datai nganjung nama bepilih nyadi ketuai pampang.
Ketegal tu mega, diatu raban pampang parti nya nyau bebagi ngagai dua tim, nitihka chalun dikerindu diri empu.
Iya ke endang udah ditemu, penuduk nya deka diperebutka antara Semana Sawang enggau Kaban Parlimen Julau Larry Sng.
Nambahka jaku iya, ku Jimmy, penuduk nyadi ketuai pampang parti besai reti ba pengawa ngenataika sebana rayat pelilih nya.
“Nya alai, penuduk tu patut dipegai chalun ari menua tu empu laban iya nemu agi nama penyadi ba rayat, enda katat-katat mantaika sebana rayat tang ukai bejakuka rayat semina ngena penemu ke diulih ari luar aja,” ku iya madah baru.
Berebak enggau tu mega, Jimmy dipinta nimbal isu bekaul enggau penyampau raban PKR Pampang Julau ti ngenyit nambah ari 704 iku sebedau Pengawa Bepilih Besai Ke-14 (PRU14) suba diatu manggai ngagai 12,967 iku.
Ku iya, udah PRU14, kebendar iya penyampau ke direjister endang sigi nambah manggai 751 iku raban ti ditatak semina ulih ngerejister naka 26 Jun tu tadi.
Tang ku iya, bisi sekeda beambi ulih ngerejister nama orang bukai ngena chara online nyentuk penyampau raban diatu nyau deka manggai ngagai 13,000 iku.
Iya madah, ulah ngerejister nama nya mega digaga ngelui ari 26 Jun.
“Sida tu endang enda nemu diri direjister nyadi raban parti.
“Nama enggau penerang sida diambi ari kad ke diberi siku chalun ngatika diri suba maya bekimpin ba PRU14.
“Kad ti ngundan nama enggau penerang sida nya diberi ngagai chalun nya ketegal ninga semaya sida deka diberi mata duit nyema chalun nya menang,” ku iya nerang.
Ku Jimmy, iya nangi, penyampau raban parti nya ke diatu semina direjister ketegal dikena matak undi maya pengawa bepilih pampang parti enda lama agi.
Agi bekaul enggau pengawa bepilih nya, iya madah, pengawa nya ila endang sigi ‘ angat’ laban ukai semina penuduk chairman aja dipilih tang mega nyentuk komiti parti ke bukai.
“Dipadahka kitai ‘angat’ laban dua iti tim (tim Semana enggau tim Larry) tu bela bisi nganjung nama enggau bepilih,” pia ku iya madah baru.
Ba pekara bekaul mega, kelimpah penuduk nyadi ketuai pampang parti, nama ke udah ditemu deka bepilih ba penuduk nyadi mandal ketuai pampang parti PKR Julau iya nya Arim Bandok enggau Wong Hong Yu.