Nembiak UNIMAS belajar sekeda pekara ari Hope Place pasal pengawa volunteer
KUCHING: Fakulti Sains dan Kemanusiaan, Universiti Malaysia Sarawak (UNIMAS) belajarka siti tauka dua pekara ari gempung ngintu pengelantang, Hope Place Kuching, apin lama ke udah.
Tu berindik ari bala nembiak UNIMAS milih Hope Place Kuching nyadi subjek ba projek sida.
“Batang tuju sida deka nemu baka ni atur pengawa dipejalai tauka nama bagi atur pengawa sereta Tusun Pengawa Standard (SOP) kami. Bala sida sebuat mega diberi pangku pengawa nyempulang kami bejalaika pengawa rama enggau ngabas sebarang palan ngintu pengelantang tauka ejensi perintah,” ku Pemungkal Palan, Kelvin Wan.
Bala pelajar UNIMAS mega bisi awak belajar ari Wan baka ni nungkus pemakai ngena chara ti betul.
Atas pengawa nya, bala sida udah nyempulang iya nganjung bantu barang pemakai ngagai raban begunaka bantu sereta berandau enggau sida sebilik ti dibantu sereta baka ni chara mansik kes, ku Wan.
Hope Place Kuching bejalaika pengawa sida nganjung bantu tetiap tiga bulan sekali laban mayuh ruang bilik ba lis penerima bantu sida.
“Kitai mega mantu sida ti timpang pendiau enggau meri sida tu tusu tepung khas enggau lampin. Kitai mega mantu raban indai tunggal enggau mayuh anak besekula, orang tuai ti ditempaya enggau sida ti penati pemisi baruh ari RM500 sebulan. Diatu kami nyaup lebih ari 180 ruang bilik,” ku Wan.
Hope Place Kuching tau dilawa nengah lumur 0135672775 tauka 082-505987 berengkah ari pukul 8.30 pagi nyentuk 12 ngalihari enggau pukul 2 lemai nyentuk pukul 5 lemai kena Hari Satu ngagai Hari Lima, tang Hari Enam, ari pukul 9 pagi nyentuk pukul 12 ngalihari aja.
Mensia mayuh ti bisi ati mantu mega tau nyuaka pemeri mata duit nengah akaun Maybank ngena nama Persatuan Kebajikan Harapan Kuching, 5112-8900-1160.