Ulah Gerija Methodist Iban Pasar Kapit begempung ngereja pengawa dipuji

KAPIT: Kaban Kunsil Nengeri ( ADUN) Bukit Goram Jefferson Jamit Unyat muji Gerija Methodist Iban Pasar Kapit ti ngatur Pengerami Bejualka Pemakai dikena ngiga belanja ungkup aktiviti gerija.

“Taja pengawa mit, tu aktiviti ti manah nengah Pengerami Bejualka Pemakai dikena ngiga belanja ungkup aktiviti gerija. Semangat keran enggau gawa siti tim nyata diayanka bala kaban gerija lebuh sida nirika bansal ti bejualka bemacham bansa pemakai ti nyamai. Ari tuju pengawa ti manah sida bekunsika juluk sama deka ngiga belanja ungkup aktiviti gerija.

“Semangat begempung negika pengawa, kerejasama enggau kereja siti tim mesti dijaga enggau dikemeran. Nyadi kaban gerija, kitai ukai semina datai ngulu misa Minggu aja, tang mega bisi pangku pengawa ngemataka pengelantang gerija mega,” ku Jamit lebuh ngelancharka Pengerami Bejualka Pemakai ba laman Gerija Methodist Iban Pasar Kapit, Hari Enam tu tadi.

Ku iya, ngelama tu penyampau tubuh raban gerija majak nambah sereta begempung. Perintah Nengeri nengah Unit Pekara Pengarap Bukai (UNIFOR) udah ngagihka RM3 juta ungkup Belanja Ngentak Gerija Baru. Chairman UNIFOR iya nya Sapit Kepala Menteri Datuk Amar Douglas Umbas, lalu gerija baru nya deka nyadi begunan kelai menua ba Kapit ila.

Jamit ngemendarka belanja penyampau RM5,000 ungkup activity gerija. Udah nya iya bejalai ngabas semua 10 bangsal sereta nyukung pengawa sida ti bejual. Tetiap bangsal iya melanja RM50 dikena bebelika pemakai.

Chairman Pengatur, Douglas Pungga ti mega Pemesai Pelilih Bukit Mabong meri terima kasih ngagai bala komiti enggau kaban gerija udah kiruh gawa dataika Pengerami Bejualka Pemakai mujur diatur.

Ku iya, tuju Pengerami Bejualka Pemakai dikena ngiga belanja ungkup aktiviti gerija lalu iya meri terima kasih ngagai semua ti ngaul diri nentuka pengawa sehari nya mujur. Tagit sida sebuat ngiga belanja penyampau RM10,000.

Tukang wang pengatur, Jacob Baleng, Reverend Jenny Wendy, Reverend Johnnycal Malet, Pastor Martius Usir, Pastor Lucy Chaong enggau Pastor Dorethycia.

SUKUNG: (Ari kiba) Cochan Alwi (pemantu Jamit), Jacob Baleng, Douglas Jamit, Jamit, Douglas Pungga, John Jaloh enggau Samuel Saw bela datai meri sukung ngagai pengawa ngiga belanja ungkup aktiviti gerija.

PENGAWA TI MANAH: Jamit (bediri) meri tabi puji ngagai Gerija Methodist Iban Pasar Kapit mujur ngatur Pengerami Bejualka Pemakai dikena ngiga belanja ungkup aktiviti gerija, (kiba iya) Douglas Pungga.

PEMAKAI ASAL: Jamit bejalai ngabas bangsal ti ngaga enggau bejualka penyaram.

BERUNDING: Jamit enda nemu ni bagi pemakai deka dipilih laban bemacham bansa pemakai bisi dijual.