BQ iya nya dokumen penerang silik bekaul spesifikasyen projek enggau skop kereja ti disedia ejensi tauka opis bekaul
KUCHING: Bala ketuai komuniti ba Betong diatu ulih matau semak pejalai projek pemansang sida empu.
Sapit Kepala Menteri, Datuk Amar Douglas Uggah Embas madahka semua projek dikemendar deka disempulang enggau Rintai Kuantiti (BQ) ti tau nyadika lalau bala ketuai komuniti.
Ku iya nerang, ari gawa baka nya, bala ketuai komuniti ulih nyeliahka projek puntan dipejalai laban BQ iya nya dokumen penerang silik ti ngundan semua spesifikasyen projek enggau skop kereja ti disediaka ejensi tauka opis perintah bekaul.
Pia mega ku Uggah, Betong dikeandal nyadi palan keterubah ba nengeri tu endur matau enggau ngenegap bala ketuai komuniti benung dipejalai.
“Ari dokumen tu, bala ketuai komuniti ulih mantu perintah nentuka pejalai nitihka semua spesifikasyen dipadah.
“Nya alai kitai ulih nyeliah sebarang pemuntan ti tau ngasuh pengilap nyadi lalu enda adil ngagai perintah. Kebuah pia, udah bisi kes projek ti enda dipejalai memanah,” ku iya lebuh bejadi nutup Mountain Bike Carnival diatur beserimbai enggau Karnival Ulu Paku ba laman Rh Francis Nyanggau di Ulu Penom, Betong kena lemai Hari Minggu tu tadi.
Sama bisi datai Kaban Par- limen (MP) Betong, Robert Lawson Chuat, Kaban Kunsil Nengeri ( ADUN) Layar Gerald Rentap, Penyanding Penemu Pemansik Sains Nengeri Sarawak, Datuk Patinggi Tan Sri Alfred Jabu Numpang sereta bini Datin Sri Empiang Jabu, Residen Bagi Menua Betong, Friday Belik.
Uggah mega madah enti sebarang kunteriktor ditemu enda nitihka spesifikasyen, bala ketuai komuniti tau mantaika pekara nya ngagai Opis Pelilih tauka bala pengari sida.
“Kitai dekaka bisi pengelurus ba pejalai semua projek transformasyen menua pesisir kitai.
“Kitai deka negapka bala ketuai komuniti ba pejalai pengawa,” ku iya nambah.
Ngelansa pasal Karnival Ulu Paku, ku iya, tu seriris enggau kuing pengawa Kepala Menteri Datuk Patinggi Abang Johari Tun Openg ti deka meda peranak menua pesisir bisi pemansut pemisi tambah nengah pengerami komuniti.
Ku iya nerang, tu kebuah perintah nengeri meri peransang enggau nyukung pengerami komuniti ba pelilih menua enggau pelilih mit nentuka peranak bisi awak ngangkatka tikas idup sida.
“Peranak menua pesisir kitai datai ari sida ti gawa nangkal getah, besawit enggau bekebun lada. Tang ari pengerami tu, sida tau ngaul diri ba pengawa dagang ari bejualka produk pemakai, kraf jari tauka nyendiaka pakej diau bemalam,” ku iya.
Ku Uggah, pengerami baka nya mega nyadi awak ungkup peranak menua pesisir ngerapitka tanggam kaul penyerakup enggau pengelantang.
“Kitai mesti bebendar nyaga penyerakup enggau pengelantang bansa laban sida tu tiang penegap kitai.
“Kitai tegap ba penyerakup, pengelantang enggau sukung ari perintah nengeri deka ngasuh Abang Johari meri fokus ba pangku pengawa iya ngemataka hak enggau peminta Sarawak,” ku iya.
Berebak enggau nya, Uggaj ti mega ADUN Bukit Saban bisi ngagihka geran Program Transformasyen Menua Pesisir (RTP) sepenyampau RM6.5 juta ungkup 44 bengkah projek ngagai bala ketuai komuniti, sekula enggau serakup ba menua nya.
Iya mega bisi nyuaka perais ngagai bala pemenang lumba engsikal bukit ti disereta 67 iku sida ti belumba nyengkaum siku ari Sabah enggau siku ari menua Australia sereta tiga iku ari tum Polis enggau ari Terengganu.