Perambu ngemansang sereta nyual rian chap Sarawak benung dipejalai

KUCHING: Perambu benung dipejalai dikena ngemansang lalu kepenudi nyual rian chap Sarawak asil bansa rian ari menua tu.

Sapit Kepala Menteri Datuk Amar Douglas Uggah Embas madah belalauka statistik dipansutka Opis Betanam Betupi Sarawak (JPS), dipelaba urung 300,000 bansa pun rian tuai (matang) menua ba Sarawak.

“Pansik enggau Pemansang ( R& D) dipejalai dikena ngemansangka pun rian tu nyadi chap Sarawak,” ku iya ba Betong kemari.

Uggah ti mega Menteri Betanam Betupi Moden, Tanah Adat enggau Pemansang Kandang Menua madahka bansa rian menua tebilang amat ngagai sida ti rinduka buah rian laban asai manis enggau lunak agi.

Ba lansa bukai, ku iya, ba timpuh lima ngagai enam taun deka datai, Betong deka mansutka rian Musang King.

Ku iya, tu deka nyadi nyata pengudah program perintah nengeri kandang diatu nanam buah ba sitak Parlimen Betong mungkur sitak Bepilih Kunsil Nengeri (DUN) Bukit Saban, Krian enggau Layar, mujur.

Nitih ku iya, perintah nengeri udah ngagihka belanja penyampau RM2.5 juta ungkup tuju nya lalu nagit nanam 50,000 pun.

Ku iya, tuju program nya dikena mansutka pemisi tambah ngagai raban bumai menua tu, ti mega nanam sawit, lada enggau getah.

“Dikena ngepunka pengawa, urung 1,000 paung udah diagih ngagai raban bumai ba sitak Paku enggau Beduru. Kitai deka seruran ngagih pengudah nerima mayuh agi utai tanam tetiap ruang bilik deka nerima lima pun paung,” ku iya nerang.

Ku iya, dipelaba enti diintu memanah, pun udah chukup tuai tau mansutka urung 200 igi ba siti musim.

Ngelansa silik, pengawa milih bansa Musang King ba program tu dipejalai laban iya bisi peminta tinggi ari makit China.

Kitai mega bisi mayuh bansa pun rian asal ti ngembuan pengulih sama. Kitai agi bejalaika pansik enggau pengawa ngemansang,” ku iya.

Kenu ku itya, JPS deka ngatur kus ngintu baru pun rian udah tuai ba Stesyen Betanam Betupi Layar Disember tu.

Kus nya ku iya deka dikenataika bala pemesai ari JPS enggau Top Fruits Sdn Bhd, serikat besai meli rian maya musim iya.

Iya madah kandang diatu, peranak menua nya enda nyaga enggau ngintu pun rian sida.

Kitai ngarap ari penemu diiri ari kus tu, peranak tauka raban bumai ditu ulih nambahka asil dipansut sereta penatai pemisi sida,” ku iya.

Uggah mega andal ari pemisi serikat besai meli asil rian ti mayuh ba Layar ila, penanggul rega mudah ulih diputar.

Kelimpah ari nya ku iya, opis menteri mega merambu nyiri mayuh agi serikat meli buan rian ari serata Sarawak.

Ku iya, siti serikat besai ulih nyual 16 tan isi rian ngagai China.

Uggah ti mega Kaban Kunsil Nengeri ( ADUN) Bukit Saban Sabtu bisi ngatur pejalai ngabas lapan buah rumah panjai ba sitak Bangkit Rembai di Betong.

Iya disempulang Kaban Parlimen ( MP) Betong, Robert Lawson Chuat, Residen Betong Friday Belik sereta bala pengari ari mayuh bengkah ejensi enggau opis.