Festival sape patut dikerembai nentuka muzik tu enda lenyau

MIRI: Pengawa ngatur festival sape patut dikerembai agi nentuka penyelai muzik nya enda lenyau kelebih agi ngagai rebak biak bansa Kayan enggau Kenyah.

Kaban Kunsil Nengeri (ADUN) Telang Usan, Dennis Ngau madah, berebak enggau nya meransang rebak nembiak ari Orang Ulu ngambi ngansak penau sida nebah Sape.

“Kitai enggaika rebak biak Orang Ulu kelebih agi diau di mengeri enda ingatka muzik asal baka Sape. Nya kebuah aku endang nyukung pengawa ngatur festival Sape dikena ngansah penau enggau nyidi penau baru,” ku Dennis.

Iya mansutka jaku nya lebuh nerima penemuai ari Komiti Ngatur Festival Sape 2018, Miri Sape Movement enggau Ethnic Corridor ditu kemari.

Rambau pejalai nemuai nya, bala kaban Miri Sape Movement nyuaka surat kangau ngagai Dennis datai ngulu festival nya ti deka diatur kena 20 Oktober berengkah urung pukul 9 pagi nyentuk pukul 10 malam ba Coco Cabana Miri.

Ngelansa pasal festival sekali tu, Dennis madah tu nyadi festival kedua berindik ari pemujur atur ti keterubah taun nyin tadi.

Antara batang tuju festival nya iya nya ngintu enggau matak raban rinduka muzik Sape kelebih agi rebak biak Orang Ulu.

Pia mega bekunsika penyelai budaya nengah muzik enggau pemerindang kelimpah nyendiaka pelasar ngagai rebak biak ngansah penau sida nebah muzik nya.

Festival ti ngemai lebih 50 sida ti nebah Sape serata Sarawak nyengkaum dua iku ti nebah Sape tebilang dunya, Matthew enggau Jerry Kamit dipelaba deka matak urung 2,000 iku pengusung.

Bela diatur galeri Sape ikon, kelas Sape, mandangka pengawa ngaga Sape enggau evolusyen Sape.

Batang pengerami iya nya ‘Sunset Sape Fest Concert’ berengkah ari pukul 6 lemai.