Sarawak ke bendar deka nyukung perambu nya nyema mai pemaik ngagai Nengeri Sarawak, Sabah enggau Malaysia
KUCHING: Perintah nengeri enda tau enda beratika baru dulu isi ubah ti bekaul enggau Pekara 1(2) Konstitusyen Malaysia, ti diperambu dikena ngemanahka status Sarawak enggau Sabah.
Menteri Muda UndangUndang,Kaul Perintah BesaiNengeri enggau Matau Projek, Sharifah Hasidah Sayeed Aman Ghazali, madahka Sarawak ke bendar deka nyukung perambu nya nyema nya mai pemanah ngagai Sarawak, Sabah enggau Malaysia.
“Naka ke diatu, kami benung nganti perambu nya sereta deka berandauka nya enggau Kepala Menteri (Datuk Patinggi Abang Johari Tun Openg).
“Kami deka nyukung seagi nya meri pemaik ke nengeri tu nengah chara meri pulai baru semua hak kitai di baruh Sempekat Malaysia 1963 (MA63) nyengkaum minyak enggau gis,” ku iya.
Iya madahka pekara nya ngagai raban pengarang lebuh dikerandau pengudah pengerami makai malam begulai enggau Menteri ba Opis Menteri Besai ( Undang-Undang) Datuk Liew Vui Keong ba sebuah hotel tebilang ditu, ensanus.
Kaban Parlimen Petra Jaya ti mega nyadi Ketuai Whip Gabungan Parti Sarawak (GPS), Datuk Seri Fadillah yusof madahka deka berandau sereta ngiga lalau ari perintah nengeri nyengkaum Kaban Parlimen GPS pasal pemanah ubah nya ngagai Sarawak, Sabah enggau Malaysia.
“Ari sukut polisi Kepala Menteri (Abang Johari) udah madah iya nya kitai ulih nyukung enda ngiga nama ke mai pemanah ngagai Sarawak ba pengawa meri pulai baru kuasa ti majak lenyau enggau nama ke udah dipesetuju dalam MA63.
“Enti tu, endang kitai nyukung tang sekalika kitai deka nyukung nama ke dibai ngagai Parlimen, aku enda ulih madahka nyentuk ke kitai meda enggau silik perambu ubah ke deka digaga nya,” ku iya ti mega dikerandau ba pengerami makai malam enggau Liew nya.
Kelimpah ari nya Kaban Parlimen Santubong, Datuk Seri Wan Junaidi Tuanku Jaafar madahka ubah Pekara 1(2) Konstitusyen Perintah Besai ti diperambu nya nyadi chara ngepun ti betul alai perintah besai mulaika status Sarawak enggau Sabah nyadi kandang menua dalam Malaysia, ukai agi nyadi sebuah nengeri.
“Ba aku ubah tu nadai nenama, semina ngubah undang- undang aja sereta semina begunaka sukung dua pertiga majoriti ari Parlimen dikena nyadika Sarawak enggau Sabah nyadi dua kandang menua di enda sama enggau Semenanjung Malaysia.
“Tu pekara ti patut diterangka ari baruh MAS63 lalu nya kebuah, Konstitusyen Malaysia ti diubah ba taun 1976 patut dipeda baru dikena ngubah nama ke bisi diatu,” ku iya dalam aum pengarang berita ditu, kemari.
Dulu ari nya, Menteri ba Opis Menteri Besai ( Undang-Undang), Datuk Liew Vui Keong madahka deka merambu ngubah Perkara 1(2) Konstitusyen Perintah Besai dikena ngemanahka status Sabah enggau Sarawak baka sebedau ubah digaga ba taun 1976.
Terang iya, perambu ubah nya deka dikenataika ngagai kabinet dulu sebedau dipejuraika ngagai Parlimen dalam aum ti ditimpuhka berengkah 15 Oktober tu.
“Enggau jaku bukai, Sabah enggau Sarawak deka bulih status sida ba ke ditulis di baruh pekara 4, MA63.
“Nama ke dikearapka aku iya nya kitai semua, rayat Malaysia, terus beserakup sereta beserakup ati dalam ngubah Artikel 1(2) sereta ngemetulkan penyiping ti diasaika Sabah enggau Sarawak pengelama tiga dekad ke udah,” ku iya.
Naka ke diatu, kami benung nganti perambu nya sereta deka berandauka nya enggau Kepala Menteri (Datuk Patinggi Abang Johari Tun Openg). Sharifah Hasidah Sayeed Aman Ghazali Menteri Muda Undang-Undang,Kaul Perintah Besai-Nengeri enggau Matau Projek