Tikas pemereti pemayar chukai majak manah
KUCHING: Pemereti pemayar chukai di serata menua tu majak nambah, bepelasarka pemayuh chukai ke ulih digumpul Lembaga Hasil Dalam Negeri Malaysia (LHDNM) tiap taun.
Taja pia, Sapit Ketuai Pemesai Eksekutif LHDNM, Datuk Mohd Nizom Sairi enda ngenggaika bisi mega pemayar chukai ti enda nitih tauka enda bejalaika tanggungpengawa ngagai pemansang ekonomi menua.
“Enti nitihka ti diperatika kami, tikas pemereti enggau puku rata iya endang udah nambah ari taun ke taun, lalu tu nyata dipeda ba penyampau chukai ke digumpul terus niki ari taun ke taun.
“Enda ngira dini menua endang bisi dua faktor, siti iya nya pemayar ti nitihka atur lalu siti agi pemayar ti engka deka nyeliah tauka nyeliahka diri, lalu pengawa kami (LHDN) bejalaika pengawa enggau enda bechiping ngagai sida ti nitihka atur.
“Kami deka nentuka orang ti enda nitihka atur tu ulih disidi sereta minta sida mayar chukai ti patut, lalu nyema bisi pengamat ngerarika diri tauka sengaja nyeliahka diri, bisi penalti deka diberi ngagai sida nya, tu sistem ke benung kami pejalaika,” ku iya ti nadai madahka penyampau pemayar chukai di menua tu ke enda nitihka atur nya.
Nizom mansutka pekara nya lebuh dikerandau raban pengarang berita, pengudah iya bejadika Program ‘Tanggungjawab Sosial Korporat (CSR) 2018 & Program Celik Cukai’ (PCC) LHDNM ke diatur ba SK Satria Jaya ditu, kemari.
Nitih ku iya, pemayar chukai ke enda niitihka atur nya ukai semina VIP (orang bepangkat besai) tang semua orang ti bepenatai pemisi tinggi ke patut mayar chukai ti ulih digiga , ditemu sereta diukum LHDNM seinpak enggau segang pemansang teknologi kemaya hari tu.
“Penyampau sida tiap taun ke enda nitihka atur nya endang mayuh, ke alai kami bejalaika audit, mansik sereta nemua chukai ti diripot sereta bayar kurang ari ke patut sekalika dikereja enggau sengaja tauka ketegal bida anggap akta nya empu,” ku iya.
Bejaku baru, Nizom ma- dahka bepelasarka program ke diatur sebedau tu, LHDNM nerima timbal ti manah sereta penyedar berengkah ari renggat sekula primari mega chukup manah, taja pan ba renggat primari semina nemu nama utai ke disebut chukai sereta ngelala LHDN.
“Kami deka meri penyedar tu berengkah ditempa ari renggat sekula ngambika jemah ila, kereja tauka tanggungpengawa ti dipejalaika LHDN ngemudahka rayat bejalaika tanggungpengawa lalu bekaul enggau penerit adat enda tentu beguna laban mayuh ti nitihka atur,” ku iya.
Dulu ari nya lebuh bejaku seraya bejadika program nya, Nizom madahka LHDNM seruran positif sereta nyukung sebarang pengawa ti ‘Merakyatkan Hasilan’ enggau pemayar chukai nengah chara betemyu enggau mensia mayuh.
Sama bisi datai ngulu program nya kemari, Direktor LHDNM Sarawak Ramlot Keli, Ketua Sektor Pengatur Pemadah enggau ICT Azizah Mohamad ti ngarika Direktor Opis Pelajar Nengeri Sarawak enggau ke bukai.