Sukung pengari rayat ti bisi meri bantu: Jamit
KAPIT: Kaban Kunsil Nengeri Bukit Goram ngelalau rayat meri sukung ngagai pengari rayat ti mantu sida lalu ukai orang ti nadai ngereja pengawa sereta semina nemu bejaku ngapa.
“Kitai patut nemu sapa bagi patut disukung. Pikir memanah. Aku matak perati bala kita ngambika nyukung pengari rayat ti mantu lalu ukai orang ti nadai kala gawa, semina nemu bejaku, mejah pemanah pengawa orang bukai.
“Perintah Sarawak mantu kita nya kebuah kita patut nyukung bala pengari rayat ari Gabungan Parti Sarawak ( GPS) laban sida ngarika perintah mantu kita, nangkup peminta enggau ngintu pengelantang kita,” ku Jamit madah nyemetak lebuh bejadika pengerami ngentak rumah 12 pintu bilik rumah panjai baru, Rumah Austin Rungga, Nanga Sepayan, semak Jematan Sungai Yong, Jalai Kapit-Song ditu, apin lama ke udah.
Iya nikalka kenang apin lama udah, Kaban Parlimen Kapit, Alexander Nanta Linggi ti datai kitu ngabas pengawa nasih tanah enggau nyungkur taba rumah panjai baru nya. Dulu ari nya, iya empu bisi kia ngabas pengawa nyambung bekal ai bukit ke beungkus RM12,000.
“Sehari tu ( kemari), aku datai kitu bejadika dua bengkah pengawa, bekal ai bukit enggau bejadika pengawa ngentak rumah baru nitihka adat asal kitai bansa Iban.
“Kenyau ari aku dipilih nyadi pengari dalam taun 2016, aku naka ulih gawaka bala pengundi ba Bukit Goram. Aku ngenang pemanah sukung enggau kaul rat bala kita. Lebuh dikangau ngulu pengawa, aku nadai kala puntan ngenataika diri laban deka ngaul diri rat enggau bala kita.
“Aku berasai lantang nyempulang bala kita. Nyadi pengari rayat kita, udah nyadi pengawa aku mantu kita ti begunaka bantu. Peranak rumah panjai begunaka mayuh bantu ari perintah.
“Aku empu enggau Nanta, kami duai ari PBB enggau ngarika perintah nengeri. Aku nyamin deka naka ulih gawa memanah. Seagi aku nyadi pengari, aku deka mantu kitai. Aku baka orang bukai, ukai orang tau ajih. Aku begunaka sukung kita, nyaup aku bejalaika pengawa manah agi,” ku Jamit.
“Sapa bagi deka disukung ba Pengawa Bepilih Nengeri (PRN) 2021 ti deka datai? Anang saru penemu, Pakatan Harapan (PH) megai Perintah Besai. GPS megai perintah nengeri betuaika Kepala Menteri Datuk Patinggi Abang Zohari.
“GPS datai ari PBB, PRS, SUPP enggau PDP, parti datai ari Sarawak, ti beratka peminta peranak Sarawak. PBB nyadi tulang belakang GPS. Nanta nyadi Sekretari PBB, mudah ngatur randau enggau Kepala Menteri.
“Semua 19 iku MP ari GPS diagih belanja dalam RTP enggau MRP dikena bejalaika pengawa ba sitak menua sida. Bala MP GPS, kami ngatika diri. Ba parlimen, kitai nyukung polisi ti manah lalu nulak polisi ti nadai nguntungka Sarawak laban nyadi peranak Sarawa, pekara Sarawak nyadi keterubah, pemerat kitai nyaga hak enggau autonomi Sarawak ti disempekat ba MA63, udah lenyau ngelama tu.
“Pekara ti nyadi ba Semenanjung nya pengawa sida. Nyadi peranak Sarawak ti bisi tanggungpengawa, kitai berunding sereta ngira hak enggau pengelebih diri. Beguna amat kitai (GPS) ngemudika perintah nengeri dikena nyaga pengaya pemansut asal minyak enggau gis,” ku iya madah nyemetak.
Iya beambika chunto pengiruh Kepala Menteri, Abang Johari nemuai ke Kapit kena 24 April 2017, ngemendarka mayuh macham projek.
Siti ari nya, RM5 juta dikena ngaga Gerija Iban Methodist Pasar Kapit baru dikena nampung penyampau tubuh raban gerija ti majak nambah. Ba program apin lama ke udah, Sapit Kepala Menteri, Tan Sri Datuk Amar Dr James Jemut Masing udah nyuaka chek RM3 juta ngagai gerija nya.
RM2 juta agi benung diatur. Pengawa nyuak chek udah dikemata MP Kapit Datuk Alexander Nanta Linggi, MP Hulu Rajang Datuk Wilson Ugak Kumbong, ADUN Pelagus Wilson Nyabong Ijang enggau Jamit empu. Sama bisi datai Sekretari Politik Kepala Menteri, Nicholas Kudi Jantai enggau Tapah Ata.
Dulu ari nya,Jamit bejadika pengerami ngentak rumah baru, tiang semin rumah panjai sereta mega ngelancharka bekal ai bukit.
Iya mega bisi ngemendarka agih belanja dikena nyemin jalai batu ari jalai besai nuju Rumah Austin, urung 300 meter pemanjai nengah belanja RTP.
Tuai Rumah Austin meri terima ngagai Jamit enggau Nanta udah nyaup sida ngentak rumah panjai baru. Ngarika bala nembiak redak, iya mantaika sukung tegap ngagai Jamit enggau Nanta.
Tuai Rumah Mathew Bena, Tuai Rumah Genrinsa, bala kaban PBB Bukit Goram, Ambrose Abong Bugek, Douglas Jamit, Cochan Alwi, Watson Awan antara bala bisi ngulu pengawa sehari nya.