Lan Berambeh Anak Sarawak 2018 deka mantaika forum ti beguna rebak baru Sarawak
KUCHING: Lan Berambeh Anak Sarawak 2018 deka mantaika forum ti narit ati sereta beguna ngambi pulaika penemu rebak baru Sarawak kemaya hari tu.
Chairman, Datuk Seri Wan Junaidi Tuanku Jaafar, madahka entara topik ke nyadi fokus iya nya Konstitusyen Perintah Besai enggau Sempekat Malaysia 1963 (MA63), enggau jaku pengelalu ti deka dikenataika Sapit Kepala Menteri, Datuk Amar Douglas Uggah Embas.
Menteri Muda Pekara Korporat, Abdullah Saidol nyadi moderator, forum nya mega deka mai speaker iya nya chairman Yayasan Tun Jugah, Tan Sri Datuk Amar Leonard Linggi Jugah, Luyar Besai Sarawak, Datuk Talat Mahmood Abdul Rashid enggau Kaban Parlimen Batang Sadong Dato Sri Nancy Shukri.
“Kitai nemu, mayuh tanya pasal MA63 lalu nengah topik tu, nya deka nyadi pelasar endur anak Sarawak nemu (pekara nya),” ku iya ba aum pengarang berita pengudah nyadi chairman aum komiti Lan Berambeh Anak Sarawak 2018, ditu kemari.
Kelimpah ari nya, Wan Junaidi madahka entara forum nya deka mantaika topik Pelan Transformasyen Sarawak: “Ke Arah Pendapatan Tinggi dan Pembangunan Negeri 2030”.
Ku iya, topik tu deka mantaika ChairmanTabung Ekonomi Gagasan Anak Sarawak, Datu Len Talif Salleh, Sekretari Perintah Negeri, Tan Sri Morshidi Abdul Ghani, Ketuai Pemesai Eksekutif Kumpulan Sarawak Energy, Sharbini Suhaili enggau Menijar Besai Kaunsil Multimedia Sarawak, Dr. Zaidi Razak.
Bejaku baru, iya madahka topik “Masa Depan Sarawak Dalam Malaysia Baharu” mega deka dipejuraika speaker ke dipilih baka ADUN Layar, Gerald Rentap Jabu, Menteri Muda Nembiak enggau Lumba enggau Main, Datuk Snowdan Lawan, Ketuai Nembiak SUPP, Michael Tiang Ming Tee enggau Ketuai Nembiak PDP, Robert Ayu.
Ku iya, siti agi topik ti narit ati iya nya “Sarawak Success Stories; From Zero To Hero” mega deka mai raban selebriti ti asal ari Sarawak baka penyanyi tebilang Noh Salleh, pemain skuasy menua, Azlan Iskandar, penerejun menua, Pandelela Rinong nyeng- kaum Kepala Pengajar SK Ulu Lubau, Jaul Bunyau.
Program ke penudi endar iya nya sesi berandau enggau Kepala Menteri, Datuk Patinggi Abang Johari Tun Openg enggau mega Pengepun ti mega nyadi Penyanding Penemu Lan Berambeh Anak Sarawak, Datuk Seri Fadillah Yusof.
Kelimpah ari nya, Wan Junaidi madahka Lan Berambih Anak Sarawak 2018 ti deka diatur kena 20 Oktober tu ba Palan Pamandang enggau Dagang Antarabansa Malaysia (MITEC), Kuala Lumpur dipelabaka deka digulu 6,000 iku anak Sarawak, ti nyengkaum nembiak sereta sida ti gawa di Semenanjung Malaysia.
Berebak enggau tu, ku iya bisi 70 bansa bejual deka dibuka ti mungkur 30 ejensi perintah enggau 40 peribit, ti mega mantaika mayuh macham pemakai tebilang Sarawak baka laksa, kek lapis enggau mayuh agi ke bukai.