Projek ngemanah Padang Sukan Stadium Kapit laun tembu ari timpuh ti patut
KAPIT: Padang Sukan Stadium Kapit ditutup kenyau ari tengan bulan Febuari taun tu tadi ketegal meri awak kunteriktor bejalaika kereja ngemanah enggau ngangkatmanah. Timpuh kunterik nya semilan bulan lalu dipelaba deka tembu dalam bulan November taun tu.
Timpuh ti dilanggur iya nya berengkah ari 9 March 2018 ngagai 8 December 2018. Diatu pengawa nya tetangguh. Rayat ditu melabaka ejensi bejalaika pengawa, Perbadanan Sukan Sarawak beratika pekara tu lalu ngeluarka penerang berita laban mensia mayuh deka nemua nama pekara ti nyadi.
Kenyau ari Jun, pekereja enggau jentera lesap lalu nadai sebarang kelai kereja dipejalai ba dia. Diatu, padang udah repa, tumbuh babas enggau kayu mit. Enda lama agi nyadi kampung, enda manah dipeda.
Mensia mayuh nyima meda kunteriktor gawa betangguh laban semina tu aja padang lumba ti ditapatka semua peranak Kapit, endur sesais pengudah tembu jam gawa maya pagi enggau ngalihari. Padang endur bemain bol enggau ngatur program maya lumba darat sekula ninting taun.
Terang amat ketegal pengelaun nya, ngujungka mensia mayuh nadai padang ti meruan bejalaika aktiviti luar sida, bala nembiak nadai padang endur belatih, nadai padang endur ngatur pekit main bol lalu baka nembiak nadai padang ti meruan bejalaika aktiviti ko-kurikulum sida, kelebih agi ba padang enggau balapan. Sinu amat meda.
Sida ti ngemeranka gaya idup bepengerai nengah sesais kelebih agi sida ti bekereja deka belawa ngelingi jalai ti ngeruga pengelikun laban mayuh entukar mansa. Bisi sekeda ngelawa Bletih Industrial Estate. Taja pia, sida ti nadai endur meruan deka sesais batang tubuh aja.
Peragam enggau sebana mensia mayuh dibantai ngagai Kaban Kunsil Nengeri (ADUN) Bukit Goram, Jefferson Jamit Unyat ti ngatur pejalai gawa ngabas taba nya pagi kemari, deka meresa empu sereta berandau enggau staf ari Opis Menteri Dagang Temuai, Seni, Main Asal, Nembiak enggau Lumba Sarawak.
Jamit meresa padang lalu berandau enggau bala staf deka nemu nama pekara ti nyadi.
Bejaku ngagai pengarang berita, Jamit nerang, nitihka timbal ari bala staf ba Padang Sukan, laun ari timpuh ketegal penanggul antara kunteriktor besai enggau kunteriktor mit.
Ku iya, kunteriktor mit keterubah udah dulu ninggalka pengawa lalu diatu kereja ditangguh kenyau ari bulan Jun. Kunteriktor besai benung nyiri kunteriktor mit baru ngambika nampung kereja.
Nadai sapa ulih madah kemaya kunteriktor baru deka datai ngambi nampung kereja.
“Aku endang beratka penanggul laun ngemanah enggau ngangkatmanahka Padang Sukan tu. Aku ngansak kunteriktor jampat agi gawa. Diatu, kitai nadai padang lumba ti meruan. Semina tu aja padang dikemisi menua Kapit.
“Lebuh iya tutup, mensia mayuh enda ulih bejalaika aktiviti luar ungkup pengerai. Aku naka ulih deka ngemai pekara tu ngagai menteri ngempu tanggungpengawa, ngarapka jampat diputar,” ku Jamit.
“Aku udah mantai ba Aum Kunsil Nengeri (DUN) minta perintah ngaga padang lumba bukai. Penyampau tubuh peranak Kapit majak nambah. Kitai endang suntuk ba perengka guna lumba.
“Lebuh padang lumba ditutup, mensia mayuh nadai endur bukai belepa enggau bejalaika aktiviti mansutka peluh pengudah jam gawa. Kitai beguna abis nadai dua padang lumba laban enti kitai kitu maya ngalihari, beratus iku ngelimpangka awak diri kitu bejalaika aktiviti mansutka peluh pengudah jam gawa,” ku Jamit nambah.