Lima sekula nerima kereban ABM ari LHDNM
KUCHING: Lembaga Hasil Dalam Nengeri Malaysia (LHDNM) nengah Pampang Kuching enggau Opis Direktor Nengeri Sarawak (PPN Sarawak) meri kereban teknologi bantu ngajar (ABM) ngagai lima buah sekula ke dipilih di kandang Kuching enggau Kota Samarahan.
Sapit Ketuai Pemesai Eksekutif LHDNM Datuk Mohd Nizom Sairi madah, nya sebengkah ari program tanggungpengawa rama korporat (CSR) ti nganyanka komiten beduduk ari pelajar diatu begunaka bantu teknologi ngambika sistem ngajar enggau belajar ti lebih efektif.
Iya madahka LHDNM ukai semina mekuh ngagai pengawa ngumpul chukai tang mega sama enggau ngambi bagi sereta regas bejalaika aktiviti CSR ngagai raban bansa.
“Program CSR sehari tu (kemari) kami (LHDNM) nyuaka lima LCD projektor ngagai lima buah sekula ke dipilih iya nya Sekolah Kebangsaan (SK) Satria Jaya, SK Tan sri Datuk Haji Mohamad, SK Pasir Pandak, SK Santubong enggau SK Tambirat.
“Kami ngarapka nengah pemeri tu ulih mantu pengelanchar enggau pengerindu nembiak kitai dalam pelajar sida, ke lebih agi laban sida tu meh aset menua jemah ila.
“Program CSR tu mega siti ari chara LHDNM deka semuak enggau raban bansa ngambika lebih dikelala ukai semina ketegal pengawa kami ngumpul chukai ke menua tang mega pengawa dalam nentuka pemansang raban bansa sereta meri penerang pasal tuju chukai dalam pemansang menua,” ku iya lebuh dikerandau raban pengarang berita.
Dulu ari nya ,Nizom mega bisi mansutka pekara nya lebuh bejaku bejadika ‘Program Tanggungpengawa Rama Korporat 2018 & Program Celik Cukai’ (PCC) LHDNM Sarawak enggau rambai jaku ‘Creating Awareness..Sharing Nation’s Prosperity’ ti diatur ba SK Satria Jaya ditu, kemari.
Nyerumba enggau tu mega LHDNM bisi ngatur Program ‘Celik Cukai’ (PCC) ke alai SK Satria Jaya nyendiaka Sukut Celik Cukai endur ngayanka penerang pasal chukai ke ulih nyadika lalau pengajar enggau apai indai bekaul enggau pekara chukai.
Nambahka nya, licha pasal chukai diatur ungkup raban pengajar sereta Kuiz Chukai Edu -Tax diberi kelala ngagai nembiak sekula.
“Meri penerang sereta penyedar ba renggat sekula primari, sekondari, kolej, universiti amat beguna dikena nempa rebak baru ti taluk seraya nerenak ulah sayauka menua sereta komited ngemansangka menua,” ku iya maya bejaku bejadika program nya.
Kelimpah ari nya, bejaku ba program ke sama Ketuai Sektor Pengatur Pemadah enggau ICT Azizah Mohamad ti ngarika Direktor Opis Pelajar Nengeri Sarawak muji aktiviti ti dipejalaika LHDNM, laban nya senipak bendar enggau objektif Opis Menteri Pelajara Malaysia (KPM).
Entara objektif KPM ku iya, ngangkatka tikas profesionalisme pengereja pengawa, ngemanahka fizikal begunan enggau kereban sekula enggau pemanah rampa menua dalam sekula sereta ke bukai.
“Nengah ABM dalam pengawa ngajar, nembiak ukai semina ulih meda pejalai pengawa tang mega ulih ngemetulka penyalah ti dikereja maya bejalaika aktiviti nya. Tu deka nyadi proses ngajar enggau belajar ti ulih narit ati nembiak.
“Nambahka nya ngena Kit dikena ngajar iya nya siti chara inovatif ke nyadi ABM ba sekula, ti ngemudahka sereta proses ngajar enggau belajar ke senang diperetika nembiak.
“Kit ti disediaka bepelasarka aspek psikologi nembiak enggau nitihka pengulih enggau penau sida nengah pengelandik ti bebida,” ku iya dalam jaku pengelalu.
Sama bisi datai ba pengerami nya Direktor LHDNM Sarawak Ramlot Keli, pemesai ari LHDNM sereta pemesai Opis Pelajar Nengeri, Kepala Pengajar enggau ke bukai.