PIBG SK Tanjung Penasu ngerami kepala pengajar sekula nya ti deka pinchin
SIBU: Gerempung Apai Indai enggau Pengajar (PIBG) Sekolah Kebangsaan ( SK) Tanjung Penasu mujur ngatur pengerami makai lemai ngintu hari pengada enggau ngerami kepala pengajar sekula nya ke pinchin, Ivy Yong, malam ensana.
Pengerami nya diatur sida ba sebuah restoren ditu sereta digulu Penghulu Jeffery Sut, Chairman PIBG Winston Suji, Patron Mendam PIBG Andrew Shilling, bala nembiak Taun 6 sereta bala apai indai.
Ivy ba jaku iya meri terima kasih ngagai PIBG enggau tuai raban bansa sereta bala mayuh ti udah meri kerejasama ngagai iya sekumbang 10 taun nyadi kepala pengajar ba sekula nya.
“Aku kediri enda ulih mai pemujur ngagai sekula enti nadai kerejasama ari PBG, tuai raban bansa sereta bala apai indai ngelama tu,” pia ku iya.
Iya ti ngintu hari pengada ke- 60 taun ensana mega beterima kasih ngagai bala pengajar SK Tanjung Penasu ti udah besaup enggau iya mai pemujur ngagai sekula nya ngelama tu.
Ivy nyadi kepala pengajar ba SK Tanjung Penasu berengkah 1 Oktober 2007 bela ngarapka semua meri kerejasama ke sebaka ngagai kepala pengajar ke baru.
Andrew ba pengerami tu mega bela beterima kasih ngagai Ivy ti ba iya udah mai mayuh ubah enggau pemujur ngagai SK Tanjung Penasu.
“Pengelama lebih 10 taun ditu, iya begulai enggau bala pengajar sereta bala staf mujur bendar ngubah sekula kitai baik nya ari akademik, kokurikulum tauka infrastruktur sekula.
“Diatu udah mayuh kelas udah diganti ngena sistem IBS,” pia ku iya madah.
Andrew bela ngarapka sekula nya mengkang bulih pemujur ba pemutus UPSR 2018 baka taun- taun ke udah.