Bayar pulai chukai dagang temuai ke udah digumpul ba taun ke sebedau tu
KUCHING: Sarawak ngarapka perintah besai mayar pulai baru chukai dagang temuai ti digumpul ba taun ke sebedau tu ngagai nengeri tu baka ti udah disemayaka.
Menteri Dagang Temuai, Seni, Main Asal, Nembiak enggau Lumba enggau Main Datuk Abdul Karim Rahman Hamzah madahka nyentuk kemari, perintah nengeri bedau nerima bayar chukai dagang temuai ti patut dipulaika ke digumpul ari temuai ari menua luar.
“Kitai ngarapka perintah besai ke diatu di baruh Pa- katan Harapan deka mayar pulai chukai dagang temuai tu ngagai Sarawak baka ti disemaya sebedau tu.
“Aku arap bendar Menteri Dagang Temuai, Seni enggau Main Asal ke diatu (Datuk Mohamaddin Ketapi) deka berundingka pekara tu,” ku iya.
Iya mansutka pekara nya lebuh dikerandau pengudah pengerami nyuaka pelanja ungkup Regata sarawak 2018 ba Bilik baum opis menteri iya di Begunan Baitulmakmur ditu, kemari.
Abdul Karim madahka chu- kai dagang temuai nya beguna amat dikena ngemansangka sektor dagang temuai nengeri kelebih agi dikena ngemanahka perengka guna dagang temuai, pengawa ngelaku, ngatur pengerami dagang temuai enggau pemansang modal mensia.
Kena Mac 2018 ex-Menteri Dagang temuai enggau Main Asal Datuk Seri Mohamed Nazri Abdul Aziz ba Dewan Rakyat madahka perintah besai deka nambahka bayar pulai chukai dagang temuai ari RM1 ngagai RM5 ba tiap RM10 ti digumpul ari temuai menua luar ngagai perintah nengeri.
Ku iya pengawa mayar pulai baru chukai nya dipejalaika enda besiping bepelasarka peratus chukai dagang temuai ti digumpul ba tetiap nengeri.
Nambahka nya nya pengawa mayar nya deka dipejalaika tetiap tiga bulan sekali terus ngagai perintah nengeri sereta madahka kenyau 1 September ngagai 31 Disember 2017, sepenyampau RM39,975,634 chukai dagang temuai ulih digumpul.
Ngenang pekara bukai, Abdul Karim ngarapka di baruh Bajet 2019 Sarawak deka nerima penyampau ungkup belanja ti sama sebela enggau nengeri bukai taja pan dipadahka nyadi penyakal ba renggat perintah besai.
“Kitai ngarapka perintah Pakatan Harapan ulih berundingka agih belanja ungkup Sarawak taja pan ba renggat perintah besai, nengeri tu dipeda nyadi penyakal.
“Taja pia, agi mayuh ke patut dikemandangka ba nengeri tu, bekaul perengka guna mensia mayuh baka jalai alun, sekula, klinik enggau ke bukai,” ku iya.
Bekaul enggau opis menteri iya, Abdul Karim madahka Bajet (nasional) 2019 penyampau ungkup belanja ke diberi ambis kurang sama enggau taun tu.
Opis menteri iya, begunaka belanja ti besai dikena ngelakuka produk dagang temuai Sarawak ngagai market dunya.
“Aku nadai penerang agih belanja ungkup opis menteri tu taun 2018, tang nama ke dikerapka kitai, penyampau ti diungkupka di baruh Bajet 2019 lebih besai tauka ambis kurang sama,” ku iya.