Bangkai niang Junaidi Lunsa udah ditemu pagi kemari
SARATOK: Siku apai tuai, 49 taun, ti diripot lenyau pengudah mupuk ari rumah panjai iya ba Sungai Engkabang, Krian, tumu pagi Hari Minggu tu tadi udah ditukuka lemas.
Nitih ku pengari ari Opis Pengerara Api enggau Penyah Penusah (Bomba) Saratok, bangkai Junaidi Lunsa Dugat udah ditemu sida sebilik ti nyereta pengawa ngiga enggau nyelamat (SAR) urung pukul 11.57 pagi kemari.
Bangkai niang ditemu urung 200 meter ulu sungai ari alai bekau kaki ti dipelaba ditinggalka niang, keterubah ditemu peranak dia, ku iya seraya madahka nya nyadi kelai ke alai niang dipelabaka lemas ti ngujungka tim SAR bejalaika insentif ngiga ba mua enggau dalam ai Sungai Engkabang.
Bangkai niang udah dibai ngena bot Bomba ngagai jelatung Pasar Saratok, sereta diserah ngagai raban polis ngambika atur pengawa nangkanka nya dipejalai, ku iya.
Pengari nya madahka lebuh tim Bomba nyaut kangau urung pukul 2 ngalihari kena Hari Satu tu tadi, sida dipadahka niang bisi ba kandang ngelingi nya urung pukul 4.30 dinihari, bedarat ari rumah iya lalu nuju ke tebing sungai besemak (Sungai Engkabang).
Baka dipadah peranak dia, niang madahka diri ngagai sida iya deka ngiga antu, aktiviti paranormal, ti dikumbai sida jenaka dinihari.
Kelimpah ari Bomba Saratok, ti bisi empat kaban enggau bot, operasyen SAR dua hari berunggu disereta empat iku polis, empat iku kaban Rela, 11 iku pemesai ari opis Nyaga Pengelikun Mensia Mayuh enggau 20 iku peranak menua nya, nepan dua bot.
Berindik ari penyelai ripot digaga, operasyen SAR udah dipejalai ba sungai enggau darat, ku iya nerang.