Ketuka pengawa meri lisin PL ngagai kompeni ladang ba tanah NCR

MIRI: Dua pengari ari Nanga Seridan di Tinjar enggau Sg Malikat di Marudi minta perintah nengeri meri penerang nama kebuah lisin Suwa Sementara ( PL) dikeluar ngagai kompeni ladang ba tanah Hak Adat Bansa Asal (NCR) sida.

Bejaku ngagai pengarang berita ba sebengkah aum penerang berita ditu kemari, TR Nanta Sandau ari Sg. Malikat madahka kenyau ari taun nyin kemari, sida udah bebala mayuh minta ngambika ngembuan lisin PL dikena ngemansangka ladang sawit ba tanah NCR sida.

“Tanah NCR kami udah diperimba orang ti enda dikelala. Tambah mega, pekara tu nyadi nyauka manggai dua taun diatu,” ku iya.

Nanta ngansak perintah nengeri beratika isu tu sereta ulih ngetuka pengawa ngeluarka lisin PL ngagai kompeni kelebih agi ba kandang menua Poyut/ Lubok Nibong di Marudi.

Berebak enggau nya, Sangaya Pagai ari Nanga Seridan di Tinjar madahka sida nadai kala nerima sebarang timbal ari opis bekuasa bekaul sekalika bisi tauka nadai projek ladang sawit meri empas ba tanah NCR sida.

Ku iya, sida udah nganjung surat ngagai Opis Bekuasa Ngintu enggau Ngemansang Tanah (LCDA) dalam bulan April taun tu tadi mantaika bantah sida senentang projek nya.

Sama bisi datai kemari Kaban Kunsil Nengeri (ADUN) Pujut, Dr. Ting Tiong Choon enggau ADUN Tanjung Batu, Chew Chiu Sing.

Dr. Ting enggau Chew bela madahka diri deka mai pekara nya ngagai aum DUN dalam bulan November.

“Aku ngarapka perintah nengeri deka mendingka sebana rayat lalu mantu sida ngetanka tanah diri,” ku Chew.

Dr. Ting mega dekaka perintah nengeri enggau bala pengari rayat ba kandang menua nya ngatur aum sereta mendingka pekara deka dibantaika rayat.

Aum pengarang berita nya diatur gerempung ukai dikuasa perintah, ‘Sahabat Alam Malaysia’.