SDGA chakah ngatur program akademik ungkup nembiak sekula

BINTULU: Serakup Graduet Dayak Sarawak (SDGA) chakah ngatur program akademik ungkup nembiak sekula kelebih agi di sitak Sebauh.

Beserimbai enggau nya sepenyampau 135 iku nembiak sekula ti deka ngambi peresa Peperiksaan Sijil Pelajaran Malaysia (SPM), Sekula Sekondari ( SMK) Sebauh, udah teulihka pemaik ari ‘Program Semarak Minda’ diatur SDGA bepalan ba Balai Mayuh Guna SMK Sebauh, ditu, apin lama ke udah.

Program berengkah urung pukul 8 pagi nyentuk pukul 5 lemai udah digulu Sekretari Politik Menteri Kereja Raya, Zakaria Abdul Hamid, lalu bejadika atur pengawa nutup propgram nya.

Bejaku ba atur pengawa nya, Zakaria muji pengawa SDGA ti chakah ngatur program ngaul akademik ba bagi menua nya, sereta meri pemaik ngagai genap iku penyereta kelebih agi sida ti deka napi peresa besai perintah.

“Program baka tu nyadi pengawa ti manah raban SDGA lalu patut diberi sukung ti rat ari raban sekula, laban ulih meri peransang ngagai sida ti ngambi peresa, sereta tau meransang sida teulihka penyulut ba peresa,” ku iya.

Pemanah pengawa gem- pung ukai dikuasa perintah (NGO) baka SDGA tu patut dipuji enggau sukung tegut semua raban laban tau muka mata enggau runding bala nembiak, naka ulih nyapai penyulut ba peresa,” ku iya.

“Nya kebuah aku ngarapka program tu deka seruran diatur dudi hari, nentuka SGDA seruran chakah ba atur program ngenegapka akademik ba menua tu,” ku iya nambah.

Berebak enggau program nya, antara slot bisi dibantai mungkur Klinik SPM iya nya chara nyaut tanya subjek ti mar dikenataika pengelicha ti dikangau khas, Wong Khim Poh, disaup enam iku fasilitator bukai sereta Licha Peransang ari Andy Kedit, ti bekunsika sekeda ‘tips’ sereta jaku peransang ngagai bala penyereta program.

Prinsipal SMK Sebauh, Gani Egit, Direktor Program Semarak Minda Siri 2, Nalong Buda, enggau Sekretari SDGA Bintulu, Cenilla Anthony Assan, antara bala bisi datai.