KGBS mantah perambu KPM nusun baru kemisi sekula
KUCHING: Perambu Sapit Menteri Dagang Temuai, Seni enggau Main Asal Muhammad Bakhtiar Wan Chik ti deka minta Opis Menteri Pelajar Malaysia (KPM) nusun baru kemisi penggal sekula,dibantah Kesatuan Guru Bumiputera Sarawak (KGBS).
Presiden KGBS, Ahmad Malie madahka perambu ngasuh nusun kemisi nya dikena ngangkatka sektor dagang temuai menua sereta ngurangka penyekut ba endur ke suah dilawa temuai menua tu empu.
Lalu KGBS ngasai sereta meda perambu nya kelebih ngagai kontra tauka negatif ari positif, ku Ahmad.
“KGBS tetap mantah perambu tu laban nya lebih berundingka penguntung ari sukut ekonomi tang pengelantang ruang bilik pengajar ti nadai kaul terus dalam perambu kemisi nya patut diperundingka.
“Ba penemu KGBS, timpuh kemisi penggal ke udah bisi diatu, agi nyadi ti pemadu manah sereta relevan ngagai raban pengajar.
“Nyema kemisi penggal tu dipejalaika bererenggat nitihka nengeri udah tentu deka meri penanggul besai ngagai raban pengajar maya deka merambu kemisi sida. Ari tu, nya deka meri empas ari sukut runding raban pengajar nya,” ku iya madah ngagai Utusan Borneo, kemari.
Bejaku baru, Ahmad madahka perambu kemisi bererenggat nitihka nengeri mega meri penusah ngagai raban pengajar ngelanggur kemisi kelebih agi ti jauh ari ruang bilik.
Nambahka nya ku iya, empas ari sukut sesi ngajar enggau belajar, sistem peresa enggau ke bukai patut diperundingka sereta dipansik enggau lebih holistik sebedau sesebengkah polisi baka polisi kemisi tu dipejalaika ila.
“KGBS enggaika polisi tu lebih meri penanggul ngagai pengajar sereta nembiak nyadi penanggul besai lebuh dipejalaika jemah ila,” ku Ahmad.
Ahmad ti ngarika KGBS meri penemu nya lebuh dipinta meri penerang bekaul enggau Opis Menteri Dagang Temuai, Seni enggau Main Asal ti deka meri perambu ngambika kemisi sekula digaga bererenggat dikena ngangkatka sektor dagang temuai enggau ngurangka penyekut ba sekeda endur ke suah di lawa temuai menua tu empu.
Bepelasarka ripot berita Bernama, Bahktiar madahka sida iya benung ngelangkar perambu nya ti deka dikenataika ngagai Opis Menteri Pelajar.
Nitihku iya, ti diperambu iya nya bekaul enggau kemisi sekula ke suah diberi ba bulan Mac, Jun enggau September aja.
“Kami benung ngumpul data ari hotel enggau pengemeran sektor dagang temuai sebedau berandau enggau Opis Menteri Pelajar,” ku iya pengudah bejadika ‘Seminar Arkeologi Negara Ke- 4’, ti diambi bejaku ari Bernama.