Asil ari pengelandik jari ulih mansutka penatai pemisi, nyungkak ekonomi
SRI AMAN: Asil pengelandik jari ari manik ti digaga bala pedagang pengelandik jari ba pelilih menua tu ukai semina ulih mansutka penatai pemisi aja, tang mega ulih nyungkak ekonomi raban sida.
Pengari Sekretari Mendam Opis Menteri Dagang Temuai, Seni, BUdaya, Nembiak enggau Lumba Sarawak, Paul Kawin Pipo madah, kandang diatu peminta asil pengelandik jari ari manik endang tinggi, kelebih agi ari komuniti ditu.
“Kitai suah meda ba pengerami diatur opis perintah enggau ke bukai, tebal agi tepa diberi ngagai bala temuai dipebasa ti datai bejadika pengawa, asil pengelandik jari dipilih raban pengatur.
“Tu ngayanka peminta kraf jari manik antara asil pengelandik jadi pemadu mayuh dipinta sereta dikerindu komuniti ditu,” ku iya.
Iya mansutka jaku nya lebuh bejaku nutup Kus Dagang Raban Nembiak Ngaga Manik diatur Opis Menteri Dagang Temuai, Seni, Budaya, Nembiak enggau Lumba Bagi Menua Sri Aman (MTACY’S) bepalan ba Bilik Aum opis nya, pagi kemari.
Ku iya, pedagang nembiak enggau dagang mit kelebih agi raban indu ba pelilih menau tu udah berengkah mantaika sida rindu nempa kraf jari ngena manik kelimpah ari pengawa beranyam ngena tali dagat.
“Berindik ari raban indu ngayanka diri rindu nempa asil pengelandik jari ari manik, meri peransang ngagai raban kitai ngatur kus ungkup sekali tu,” ku iya.
Kus diatur sehari nyentuk nya ngaul 30 iku penyereta indu, datai ari pedagang asil pengelandik jari ba Sri Aman.
Batang tuju kus dikena nempa, matih enggau matak raban nembiak rinduka pengawa ngaga asil pengelandik jari ari manik.
Kelimpah ari nya, ngerembaika bidang ngaga asil pengelandik jari ari manik ngagai raban nembiak, seraya nempa, ngemansang sereta nambahka pengulih enggau pengelandik bedagang kelimpah ngadaka pengandal bedagang ngagai raban nembiak.
Sama bisi datai, Pemesai Nguasa MTACY’S Bagi Menua Sri Aman, Sain Kerani enggau Pemesai Nguasa MTACY’S, Bagi Menua Betong, Awang Mazelan Awang Majid.
Kus nya udah dikenataika siku pedagang asil pengelandik jari ari manik ba Sri Aman, Priscilla Chendai.