Lukanisman: Sungai Sibuti ulih nyadi palan nempa jaguh lumba ai di nengeri tu

MIRI: Sungai Sibuti ulih nyadi palan dikena nempa mayuh agi jaguh lumba ai nengah pengawa ngatur regata tauka lumba ai ti diatur ninting taun.

Kaban Parlimen (MP) Sibuti, Lukanisman Awang Sauni madahka pengerichah regata tauka lumba ai ukai semina diasaika sida ti rinduka iya, tang mega matak rebak pemekit belumba baru.

“Aku pechaya pengawa ngatur lumba ai tu ukai semina ngidupka baru pengerichah tebing Sibuti, tang mega ulih nempa mayuh agi raban bepenau sereta jaguh menua tu,” ku iya kemari, lebuh ngelepaska raban bepekit belumba bot injin pam beserimbai enggau Lumba Ai Ranchah- Ranchah Bekenu kemari.

Pekit nya diatur begulai Kelab Lumba Ranchah- Ranchah enggau kerejasama Palan Servis Pengari Rayat Parlimen (PKWR) Sibuti enggau PKWR ADUN Bekenu.

Lukanisman madahka Sungai Sibuti ti dulu suba sunyi nadai sebarang aktiviti ai diatu berubah enggau rauh munyi injin pam.

“Kitai endang meransang pengawa ngatur lumba ai laban tu ukai semina pelasar sida tu rinduka pekit lumba bot injin pam, tang mega nyungkak ekonomi raban dagang,” ku iya.

Pia mega ku iya, Regata Subis tauka Regata Sibuti mega udah diatur ba sungai nya lalu udah ngidupka pengerami ujung minggu pasar Bekenu.

Nya keterubah diatur kena 11 Julai 1959 ba Tebing Sibuti lalu diatur baru dalam taun 1988. Kepenudi iya diatur dalam taun 2013 ba Sungai Sepupok, Niah.

Batang tuju nerenakka semengat penyerakup enggau bebatak asur antara bansa kelimpah ngelaku enggau ngetanka semengat asal lumba ai baka regata enggau lumba perau ngagai bala komuniti.

Kelimpah ari nya, mantu ngerembaika pengulih sektor dagang temuai enggau ekonomi ba pelilih Subis sereta nyungkak tikas ekonomi rama komuniti menua nya.