HSN Renggat Nengeri Sarawak 2018 richah enggau bemacham aktiviti

Utusan Borneo (Sarawak) - - Berita Iban -

KOTA SAMARAHAN: Hari Lumba enggau Main Menua ( HSN) Renggat Nengeri Sarawak 2018 udah diatur enggau richah nengah macham aktiviti lumba enggau main ba palan bebeli barang Summer Mall ditu, kemari.

Pengerami hari lumba enggau main renggat nengeri nya bisi dipasuk beribu iku orang ti nyengkaum ke datai ari kandang endur ke ngelingi Kota Samarahan.

Renggat Nengeri Sarawak, HSN diatur Opis Nembiak enggau Lumba enggau Main Nengeri Sarawak sereta Opis Residen Bagi Menua Samarahan, ti udah dipenyadika Direktor Opis Nembiak enggau Lumba enggau Main Nengeri Sarawak, Mohd Nizam Ismail.

Nyerumba pengawa bejadika HSN Renggat Nengeri Sarawak 2018, Sapok Biki (Sukan Tinju) enggau Buda Anchah (Sukan Bina Badan) dipilih nyadi Ikon Sukan sereta nerima Sijil Penghargaan ti disuaka Nizam.

Mayuh aktiviti diatur ti berengkah enggau erobik bebala mayuh ti mega dipasuk Nizam; pemerindang Wheel Chair Dance ari Kuching Spinal Injury Association sereta madangka chara ngetanka diri -Unarmed Combat & Self Defence ari Markas 1 Divisyen Kem Muara Tuang.

Kelimpah ari nya entara aktiviti bukai ke bisi diatur mega baka Lompat Tali Untuk Jantung (Sekolah Menengah Kota Samarahan); Pekit Bina Badan (Badan Cantik); Pekit Aerobathon; e-Sport mobile Legend; e-Sport Fifa 19; Arm Wrestling; StrongFit Challenge; Program Sukan Integriti; OKU Catur sereta mayuh ke bukai.

Pengerami Hari Lumba enggau Main Menua udah ditetapka diintu tiap Hari Enam (Sabtu) minggu kedua bulan Oktober tiap taun, ti sebengkah ari inisiatif Opis Menteri Nembiak enggau Lumba enggau Main ke alai nya chara ti regas dalam proses transformasi ke deka nyadika Malaysia sebuah ‘Negara Bersukan’.

Hari lumba enggau main tu nyadi agenda nasional senipak enggau juluk menua nuju Wawasan 2020.

Taun tu Hari Lumba enggau Main diatur sereta ba serata menua ti dipasuk nyengkaum sektor perintah, peribit enggau rayat.

NGAMBI BAGI: Entara pesereta ke sama enggau ngambi bagi senam erobik, kemari.

NGEPUN: (tengah) Nizam ti disempulang (kiba) Sapok enggau (kanan) Buda sama enggau ngambi bagi dalam senam erobik ngena stepboard, maya ngepunka program HSN Renggat Nengeri Sarawak 2018, kemari.

SENAM EROBIK NGENA FITBALL

SENAM EROBIK NGENA KERUSI

WHEEL CHAIR DANCE ARI RABAN KUCHING SPINAL INJURY ASSOCIATION

UNARMED COMBAT & SELF DEFENCE ARI MARKAS 1 DIVISYEN KEM MUARA TUANG

Newspapers in Malay

Newspapers from Malaysia

© PressReader. All rights reserved.