Pengawa tu ukai semina dikena ngiga jaguh dunya, tang ulih mantu nurunka penyampau sakit raya ba komuniti

Utusan Borneo (Sarawak) - - Berita Iban -

MIRI: Ngemeranka pengawa lumba ukai semina deka ngiga jaguh dunya aja, tang patut dikena mantu nempa rayat Malaysia ti bepengerai agi, ku Kaban Parlimen ( MP) Miri Dr Michael Teo nerang.

Ku iya, aktiviti lumba ukai semina nyadi gaya idup regas enggau chakah, tang mega gaya pengawa mantu nurunka penyampau sakit raya ngagai bala komuniti.

“Kemaya hari tu, bemacham bansa penyakit ti enda berampit ditapi bala komuniti kitai baka kelalu gemuk, kemi manis enggau sakit tungkul ati.

“Enti kitai semina diau diri aja lalu nejuka penyakit nya majak nyadi, ke alai ungkus berubat ti deka ditanggung kitai ukai semina ngagai rayat aja, tang mega ungkus melanja perubat mensia mayuh mega deka nambah,” ku iya.

Dr Teo mansutka jaku tu rambau pengawa ngelancharka Hari Lumba Menua 2018 Renggat Bagi Menua Miri, diatur Opis Nembiak enggau Lumba Bagi Menua Miri enggau kerejasama Kelab Berbasikal Kerbau Bull Miri bepalan ba Stadium Bandaraya Miri, kemari.

Nya alai ku iya, aktiviti lumba enggau ulah ngemeranka gaya idup bepengerai nyadi chara dikena nyeliah enggau nagang penyakit nya.

“Enti kitai gerai, kitai deka berasai lantang enggau regas. Asai ati gagit enggau produktiviti tinggi ti diasaika bala kita pengudah ngaul diri ba lumba patut seruran diterenak,” ku iya.

Runding baka nya ku iya, enti seruran bisi diasai rayat Malaysia, ulih nyapai juluk Malaysia nyadi sebuah Menua Lumba enggau rayat bepengerai.

Iya mega dekaka sukung enggau tanggungpengawa ari kesemua serak komuniti ba aktiviti lumba seruran bisi dikena mantu ngubah Ma- laysia nyadi Menua Lumba, kelimpah nyadi pelasar peny- erakup rayat pupu bansa enggau gempung nasional. Dr Teo udah nya ngelepaska pengawa belanda ‘Fun Run 4KM’ ti disereta 2,500 peyereta, enggau ‘Fun Ride 30KM’ ti disereta 160 penyereta ngena engsikal nyerumba Hari Lumba Menua 2018 Bagi Menua Miri.

Bela diatur aktiviti zumba ari Kelab Kecergasan Evolution Fitness Permyjaya, Miri Streetworkout enggau Calisthenics Battle Volume 2 diiring 0Gravity Calisthenics Academy, enggau Fitness Challenge ari 911 CF Miri sereta diselang enggau chabut benasit.

Sama bisi datai Kaban Kunsil Nengeri ( ADUN) Pujut Dr. Ting Tiong Choon, Penulung Pemesai Nembiak enggau Lumba Bagi Menua Miri Stephanie Wendy Stamford, Pemesai Nguasa Opis Dagang Temuai, Seni, Budaya, Nembiak enggau Lumba Miri Ennie Lukong, Presiden Kelab Berbasikal Kerbau Bull Miri Fadly Rusli sereta bala bukai.

Kemaya hari tu, bemacham bansa penyakit ti enda berampit ditapi bala komuniti kitai baka kelalu gemuk, kemi manis enggau sakit tungkul ati. Dr Michael Teo MP Miri

BASA: Stephanie nyuaka tepa ngagai Dr Teo kelai terima kasih seraya dikemata Dr Ting, sereta bala bukai.

Newspapers in Malay

Newspapers from Malaysia

© PressReader. All rights reserved.