Siku lelaki timpang pendiau ti diripot lenyau di Julau udah ditemu mati

JULAU: Siku lelaki ti diripot lenyau kena 8 Oktober (Hari Satu) ba Julau ditu, udah ditemu mati ba sebuah rumah puang enda jauh ari rumah panjai niang, malam kemari.

Ketuai Polis Pelilih Julau, DSP Bidol Noyeng madah, bangkai niang udah ditemu gali gegaring peranak rumah panjai ti ngaul diri ba operasyen Ngiga enggau Nyelamat (SAR) niang urung pukul 9 malam.

“Niang benama Janathan Lidum, 44, ari Rumah Budit Entabai Julau udah ditemu mati pengudah niang diripot lenyau ari rumah iya kenyau ari lima hari ke udah.

“Pansik tumu tetemuka niang ti singkung, mati ketegal lepi enda makai.

“Nadai sebarang bakal, telih tauka sebarang pengawa salah ditemu ba tubuh niang lalu kes tu dikumbai mati ngenyit,” ku iya lebuh dirandau media kemari.

Ba penusah nya, niang diripot lenyau sida sebilik kena 8 Oktober tu tadi, pengudah niang nadai dipeda ayan ba rumah.

Petunggal niang udah bebendar ngiga niang lebuh hari niang ditemu lenyau, tang puntan.

Irauka pengelikun enggau gaya pendiau niang, petunggal iya ngabas ngagai rumah panjai tang nadai meda iya ba rumah sida.

Berindik ari nya, siti ripot polis udah digaga minta bantu bejalaika operasyen SAR dikena nyidi niang.

Berebak enggau nya, peranak dia naka ulih ngiga niang ba beberapa endur tang puntan tetemuka bekau niang.

Lemai kemari, raban bomba mega dipadah pasal pekara lalu dipinta nyaup operasyen SAR.

Ketuai Opis Bomba enggau Penyah Penusah Bintangor, Nicholas Belulin madah, pengudah nerima ripot bekaul enggau penusah nya, raban bomba terus ngelawa endur penusah nyadi.

“Ba hari keterubah SAR dipejalai, niang lalu nadai ditemu bekau, operasyen udah ditangguh urung pukul 5 lemai, ditimpuh deka ditampung baru sehari tu (kemari).

“Taja pia, urung pukul 9 malam Hari Lima, raban kitai dipadah niang udah ditemu, berindik ari nya, operasyen SAR udah diketu,” ku iya.