Larry: Anang datai ngundi nyema enda arapka diri nyadi kaban PKR
KUCHING: Kaban Parlimen (MP) Julau Larry Sng ngelalau bala kaban Parti Keadilan Rakyat (PKR), kelebih agi sida di baruh pampang Julau patut anang datai ngundi enti sema sida bisi enda arapka diri nyadi kaban.
Iya nyamin undi sida enda deka disalah guna laban parti bechuanka ‘evoting’ ti begunaka orang nya datai enggau tingki sida ngulihka ‘QRC code’ dikena sida ngundi chara elektronik.
“Nya ( sistem e- voting) nyadi pekara nyata enggau nyauka nadai pengilap. Enti sida deka ditingkil ari lis parti, sida diperandang datai ngagai palan servis aku ba Julau tauka Pakan, lalu kitai deka nganjung penerang silik sida ngagai indu opis PKR ngambika ditingkil ari lis kaban,” ku iya.
Larry, ti ngirai diri empu mangku pengawa chairman PKR pampang Julau, nyaut berita dikeluarka Borneo Post kemari, ke alai pengundi ari Meluan, Kaya Usit, madahka diri tekenyit, baka ni nama bini enggau tiga iku anak iya bisi disengkaum ba lis nyadi kaban PKR Julau.
Kaya madahka bini iya, dua anak indu enggau siku anak lelaki iya, nadai kala ngisi sebarang pom nyadi kaban PKR, seraya nambah, sida mega nadai kala betemu enggau sebarang pengari tauka pemesai ari opis PKR menua nya senentang nyadi kaban.
Kaya mega betanya sekalika nama sida terus dilis nyadi kaban PKR laban nyadi pengundi ba sitak parlimen Julai.
Ba pekara nya, ku Larry, iya empu enda nemu bagi orang ti disebut nya.
“Taja pia, pekara ti ditemu aku iya nya bisi nambah ngenyit penyampau tubuh bala pengundi kenyau ari Pengawa Bepilih Besai Ke- 14 serata menua. Ba Sarawak, kelebih agi Julau, mayuh bala penyukung aku nyereta parti kenyau ari aku nyemilik PKR.
“Taja pekara tu diperansang bala ketuai PKR, bisi sekeda raban ngasaika penuduk diri enda entap lalu bekenaka semua chara nginsil nyadi kaban dikena nginsil undi ba Julau. Tu datai ari penerang ulih dipechaya dalam parti,” ku iya.
Iya madahka raban minoriti tu nangi maya bala kaban ari Julau ngundi, juluk politik Datuk Seri Mohd Azmin deka puntan diatu, ke alai pemutus bepilih ba nengeri bukai nadai mayuh takah.
Azmin bepadan enggau Rafizi Ramli berebutka penuduk sapit presiden. Larry udah terang mantaika sukung iya ngagai Rafizi diangkat nyadi orang lumur dua parti.
“Nya kebuah Julau enda baka sebarang pambang bukai ti beberita amat,” ku Larry.
Isu ‘astronomical rise’ ba pemayuh tubuh kaban PKR Julau ari 603 kena 26 Jun taun tu ngenyit 13,000 sehari udah nya, dikeluarka The Borneo Post apin lama ke udah.
Nitih ku berita dikeluar apin lama ke udah, PKR Sarawak ditimpuh deka ngatur pengawa bepilih kena 10 November.
Larry nyemilik parti PKR pengudah iya menang penuduk Julau ngena tikit ngatika diri kena 9 Mei ba pengawa bepilih besai.
Iya mega nyadi chalun ditaga ulih menang ungkup penuduk chairman PKR JUlau, sereta mega nyadi siku ari mangku pengawa parti ba Central Leadership Council.