JBALB Sarawak bebendar deka mutarka penanggul ai ke nyadi entara Kuching-Serian
KUCHING: Opis Bekal Ai Menua Pesisir (JBALB) Sarawak madah, raban sida benung ngengkahka baru beberapa sambung batang paip Kuching-Serian ba renggat keterubah lalu dipelaba tembu ujung taun tu.
Nitih ku penerang berita kemari, nya bekaul enggau pengawa nyambung paip ai besai enggau ngaga stesyen ‘booster’ pam dikena nyambung ai beresi ari Palan Meresi Ai Batu Kitang sereta ngemanahka sistem bekal ai ba sitak Siburan enggau kandang ngelingi.
“Raban JBALB Sarawak bebendar amat nentuka semua penanggul bekal ai tejanggal diputar enggau jampat.
“Semua pengerembai atur pengawa ngemanah ke pemadu baru deka seruran dipadah ngagai bala penguna,” ku iya lebuh nimbal ripot media menua tu senentang isu bekal ai ditapi peranak ti diau ba kandang menua Siburan enggau ngelingi kemari.
Taja pia, kandang menua nya diberi bekal ai beresi ari Palan Meresi Ai Tapah (dibaruh pegai JBALB) eng- gau sukung tambah ari Palan Meresi Ai Batu Kitang ari baruh pegai Kunsil Ai Kuching (LAK).
Penanggul bekal ai ke enda meruan sereta enda deras ketegal guna ai majak nambah, sistem sambung paip ai besai ti mit sereta sebagi ari penguna diau ba endur ti tinggi.
Penanggul bekal ai majak nyadi ketegal sistem sambung paip ai LAK alit ngujungka bekal ai ngagai kandang endur dibaruh pegai JBALB tejanggal berengkah ari 10 Oktober nyentuk ke diatu.
Kereja bebagika ai sereta pengawa nganjung ai ngagai endur kena bepenanggul nya mega udah dipejalai raban sida enggau LAK seraya nganti kereja ngemanah tembu dipejalai.