Graduet diploma TVET deka diberi peluang nampung pelajar ngagai MTUN

KUCHING: Perintah merambu meri jalai ngagai semua graduet diploma ari Institusyen Pelajar Latih Teknikal enggau Vokasional(TVET) nampung pelajar sida ngagai renggat ijazah ba semua Universiti Teknikal Malaysia(MTUN).

Ketuai Direktor Bagi Opis Pelajar Politeknik enggau Kolej Komuniti, Prof Dato Ts. Dr. Mohd Ismail Abd Aziz madah perambu nya seriris enggau pengeran perintah ngangkatka TVET di menua tu.

“Kitai bisi nyendia tujuh ijazah di Politeknik tang bebida enggau unversiti bukai alai pelajar meseti nempuh latih industri pengelama setaun.

“Tang diatu kitai bisi chara baru ke alai MTUN udah meri jalai ngagai semua pelajar Politeknik masuk MTUN ngambika ulih nampung pelajar sida ngagai renggat ijazah,’ku iya.

Dikena ngemujur pekara nya ku iya nambah, semua graduet diploma Institusyen TVET diterima masuk ba MTUN.

Iya mansutka jaku nya ba pengawa ‘ Sesi Town Hall Pemerkasaan TVET Zon Sarawak’ ke diatur di Institut Kemahiran MARA, Jalai Sultan Tengah ditu, kemari.

MTUN nyadi gempung empat universiti bepelasarka teknikal iya nya Universiti Malaysia Perlis (UniMAP), Universiti Malaysia Pahang (UMP), Universiti Teknikal Malaysia Melaka (UTeM) enggau Universiti Tun Hussein Onn Malaysia (UTHM).

MTUN nyaup ngangkatka TVET di Malaysia lalu nempa raban profesional bepengelandik tinggi ke diguna menua dikena nyapai status menua mansang.

Program akademik ke disedia MTUN beratka pinta ba pengawa industri bepelasarka praktikal lalu bechuanka model ‘ fachhochscule’( FH) ti dikemeran di Jerman.