40,669 ketuai ruang bilik nerima bantu ari KWKPK naka Mei 2018

SEMATAN: Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit ( KWKPK) ngerikod 40,669 ketuai ruang bilik serata Sarawak nerima bantu pengelantang naka bulan Mei taun tu.

Menteri iya Dato Sri Fatimah Abdullah madah, ari penyampau nya, 6,259 ari bagi menua Kuching, 783 ari Bau lalu 1,471 ari pelilih Lundu.

“Di baruh Bajet 2018, sepenyampau RM10 juta diagih ungkup Sarawak di baruh Program Ngemunaska Penyeranta ( PPK) dikena mantu 1,645 ketuai isi bilik ti rejista di baruh e-kasih,” ku iya.

Fatimah mansutka jaku nya nengah jaku iya dibacha Menteri Muda Orang Indu, Ruang Bilik enggau Pemansang Anak Mit, Rosey Yunus, ti ngarika iya ba pengawa nutup Program Ngintu Pengelantang Komuniti di Telok Melano ditu, apin lama ke udah.

Seraya sepenyampau 29 isi bilik ditu nerima bantu di baruh PPK ba atur program nya.

Iya madahka penerima bantu tu nyengkaum dua ari Telok Melano enggau siku ari Telok Serabang.

Ku iya, bantu nya diberi nengah program 1AZAM datai ari perintah besai, ungkup isi bilik ti rejista enggau e-kasih.

“Aku ngarapka iring enggau bantu disediaka perintah nengah program tu, sida tau gawa bebendar agi ngangkatka status ekonomi ruang bilik sida empu sereta bela gawaka pengelantang komuniti ba Sarawak,” ku iya.

Ku iya nambah, dua penerima ari Telok Melano enggau siku ari Telok Sera- bang nerima bantu kereban dikena ngepunka dagang di baruh Program AZAM Niaga, 1AZAM.

Penerima ari Telok Melano nerima kereban dagang dikena bejait seraya penerima ari Telok Serabang nerima kereban dagang nuchi kerita, ku iya.

Program Ngintu Pengelantang Komuniti ti diatur ba Telok Melano pengelama dua hari beungguh diisi enggau bemacham aktiviti baka kelas berapi enggau lumba rama.

Sama bisi datai Sekretari Mendam KWKPK, Dr Saadiah Abdul Samat.