Jalai Sarikei-Tanjung Manis beungkus RM400 juta berengkah digaga taun baru
SARIKEI: Pengawa ngaga jalai ti nyambung Sarikei enggau Tanjung Manis dipelaba beungkus lebih RM400 juta deka berengkah digaga ba taun baru.
Kaban Kunsil Nengeri (ADUN) Repok, Dato Sri Huang Tiong Sii madahka agih belanja nya mega mungkur ngaga sebuah jematan meraka Sungai Rajang 1.2 km penyauh sereta jalai 18km penyauh.
“Pengawa ngaga perengka guna nya deka ngenegapka agi Rentayan Pengangkut Zon Tengah Sarawak sereta ngerichahka agi ekonomi ba kandang Halal Hub enggau Koridor Kuasa Ulih Dikena Baru Sarawak (SCORE) ba sitak Tanjung Manis.
“Perengka guna tu ila deka ngemai pengelantang enggau penyampat perengka pengangkut darat ungkup komuniti kelimpah ari ngena alternatif rentayan sambung bukai.
“Kitai andal amat ba pengawa tu ila deka nempa ekonomi tumbuh manah ti meri pangka manah ngagai komuniti menua nya ti udah lama ngarapka jalai digaga dia.
Huang mansutka jaku nya ba Program Pemesai Begulai Enggau Rayat ba Rumah Jawi, Sungai Bulat, semak ditu, kemari.
Jalai tu ila deka nyambung ngagai jalai besai ari Sibu ngagai Tanjung Manis.
Nitih ku Huang, pengawa ngaga jalai mega dipelaba deka meri pangka manah ngagai pengawa perintah ngangkatka menua baka Sarikei, Bintangor enggau Sibu nyadi palan besai ngumpul asil betanam betupi ba kandang menua tengah Sarawak.
“Kitai ngarapka projek tu deka bejalai lanchar lalu tembu nitihka timpuh ti udah ditetap ila.
Berindik ari nya, kitai ngarapka bala komuniti ulih nyendiaka diri sereta ngiga awak pemadu manah ngambika sida ulih ngena memanah perengka guna tu ila, kelebih agi ba pengawa nambahka penatai pemisi,” ku Huang nandu.
Urung 100 iku peranak menua nya datai ngulu program begulai enggau bala ketuai komuniti menua nya.