Abom begunaka saup ari mensia mayuh nengah Hope Place Kuching
KUCHING: Siku lelaki kurang benasit ngapil ngagai mensia mayuh mantu iya nengah gempung ngintu pengelantang, Hope Place Kuching.
Abom Baja, 58 taun, ari Samarahan, enda dapat bejalai lalu tebal agi semina ngena kerusi roda aja.
Iya sebedau tu siku pekereja kunterik, ngiga belanja maya iya ulih tang semua nya nadai ulih dikereja pengudah iya kena penusah bebadi ba jalai alun dalam taun 2017, maya nepan motosikal.
Diatu Abom enda ulih ngiga sebarang belanja ungkup diri empu lalu semina bepanggai ba pengasih orang bukai,” ku Pemungkal Hope Place Kuching, Kelvin Wan.
Abom diau kediri ba rumah mit tang rumah nya semina bisi jemari enggau nadai dis- ambung bekal kuasa karan tauka bekal ai, ku Wan.
Abom bisi tangki ai ba luar rumah lalu tu dikena iya nimbun ai ujan, ku iya nambah.
Iya mega ngena api kelita maya malam hari.
“Urung setaun ke udah, Abom mujur ngidupka diri laban dibantu enggau pengasih peranak genturung pendiau sereta bala bakih. Penyiru mensia mayuh bebelika pemakai sereta mega barang diguna ninting hari, ungkup iya, bisi maya sida mega meri iya belanja. Tang iya enda ulih idup baka tu belama. Iya mega patut meruan,” ku Wan.
Hope Place Kuching semina ulih mantu mimit aja.
Naka diatu, NGO ti mantu Abom nyendiaka pemakai enggau ai diguna iya.
“Kerusi roda Abom diberi SOSCO lalu bala bakih iya mega mantu ngulihka bantu pengelantang rama. Abom mega megai kad orang timpang pendiau. Tang aku ngarapka bantu seruran bisi diberi ngagai iya,” ku Wan.
Hope Place Kuching tau dilawa nengah lumur 0135672775 tauka 082-505987 berengkah ari pukul 8.30 pagi nyentuk pukul 12 tengahari enggau pukul 2 lemai nyentuk pukul 5 lemai kena Hari Satu ngagai Hari Lima, tang semina pukul 9 pagi nyentuk pukul 12 tengahari ninting Hari Enam, enti mensia mayuh begunaka penerang silik enggau tanya ti patut.
Mensia mayuh ti bisi ati meri bantu mata duit tau meri bantu sida ngagai Persatuan Kebajikan Harapan Kuching nuju lumur akaun Maybank 5112-8900-1160.