Rumah Benggau ti bulih gela champion ‘Anugerah Desa Perdana 2017’ patut nyadi pemansang chunto rumah bukai
KAPIT: Bala ketuai bansa enggau ketuai komuniti ( KKKM) sereta Pemesai Ngatur Pengawa ba Opis Residen enggau Pelilih Menua di serata nengeri udah dipilih nyereta Nemuai Seraya Kereja Transformasyen Menua Pesisir (TLB) Begulai Enggau Raban KKKM ngagai Rumah Benggau, Nanga Sut, Baleh, Kapit pengelama tiga hari berunggu.
Dikearap pengudah penemuai tu, mayuh Rumah Benggau ba bagi menua bukai. Tu batang tuju pejalai kitai. Datu Jaul Samion Sapit Sekretari Nengeri
Pejalai udah diatur Sapit Sekretari Nengeri, Datu Jal Samion, udah ngulu Pengawa Meri Penerang Pemansang Bagi Menua Kapit, dikenataika Residen Kapit, Joseph Belayong bepalan ba Komplek Bletih Nengeri ditu, apin lama ke udah.
Penerang mungkur semua pekara ba Kapit nyengkaum atur pengawa, pekara politik, raban bansa, pengentap pendiau (genturung enggau rumah panjai), ekonomi rama, infrastruktur enggau penyikap perengka guna, pelajar sereta ke bukai.
Batang tuju pejalai sida sebuat, keterubah deka meda nama pengering Rumah Benggau ti ngasuh iya bulih gelar champion renggat menua, ‘Anugerah Desa Perdana 2017’.
Niat Datu Jaul Samion, kelimpah nyadi Sapit Sekretari Nengeri, iya mega megai tanggungpengawa ngagai TLB.
Iya deka ngubah kandang menua pesisir ngambika bisi penetap baru ba pekara nyadi ketuai, runding enggau ngatur pengawa ti meruan ba JKKK sida, laban enti beratika Rumah Benggau, bisi mayuh rumah panjai bukai manah agi (ba pekara fizikal enggau infrastruktur).
Tang Rumah Benggau angkat laban bisi kualiti ba atur pengawa sida. Rumah panjai tu mega bisi website sida empu, ngambika orang ti bisi ati berandau enggau peranak Rumah Benggau, ngelawa website nya.
Tu teknologi ditunda enggau dikemeranka sida. Tu sebagi ari teknologi pemadah, mayuh rumah panjai tinggal.
Jaul ngarapka bala pemesai pengatur pengawa ti datai nyempulang KKKM, pengudah mendingka penerang ba Rumah Benggau, sida deka pulai ngagai pelilih menua diri empu tau nunda tauka bechuanka pekara dikemisi ba Rumah Benggau.
“Dikearap pengudah pejalai tu, mayuh Rumah Benggau ba bagi menua bukai. Tu batang tuju pejalai kitai.”
Tu pejalai keterubah diatur Sapit Sekretari Nengeri, diembing Datu Jaul Samion. Iya ngarapka tu deka muka mata ukai semina komuniti Iban aja, tang mega komuniti Melayu, Bidayuh enggau komuniti bukai pulaika ajar ti manah ari atur pengawa ti manah. Kapit benasit amat laban bisi Rumah Benggau nyadika teladan.
Datu Jaul Samion, Pemesai Pelilih Kapit Elvis Didit, Pemesai Pelilih Song Jacklyn August, Pemesai Pelilih Bukit Mabong Douglas Pungga, OCPD Kapit DSP Freddy Bian, Sapit Residen Sarikei - Abang Mohamad Porkan, Sapit Residen Samarahan Richard Michael, Pemesai Pelilih Selangau Inting Nyami, Pemesai Pelilih Tebedu Joseph Liew, Pemesai Pengatur Pengawa (AO) Pelilih Betong Lester Clement, AO Limbang Cherrylnna Leeza, AO Marudi Va- nessa Joseph, AO Tatau Calvin Ligoing, AO Kuching Jamica Humpa, AO Kapit Bidah Lujah, AO Bukit Mabong Jason Kong, Pemesai ari Institut Ke Pemansang Menua Pesisir Manggi antara raban KKKM bisi ba rumah panjai.
Pejalai belajar tiga hari berunggu ba Rumah Benggau, bejalai ngagai Makit Terasang beratika baka ni chara bansa Dayak bedagang, enggau nemuai meri basa ngagai Residen Kapit sereta ngulu Penerang Pasal Pemansang Bagi Menua Kapit.