Dua projek deka digaga ba Skim Pengentap Baru Pendiau Nanga Ngungun

KANOWIT: Dua projek deka dipejalai ungkup pengelantang peranak rumah panjai ba Skim Pengentap Baru Pendiau Nanga Ngungun ditu enda lama agi.

Kaban Kunsil Nengeri (ADUN) Ngemah Alexander Vincent madahka projek tu iya nya ngaga lurung bejalai ngelawa tadika enggau sekula primari dia sereta ngaga jalai ke meruan agi ngagai pendam ungkup komuniti ba pengentap baru pendiau nya.

Iya mega ngemendarka RM1.5 juta ungkup projek nya lebuh iya bejadika pengawa nutup Festival Nanga Ngungun ba pengentap baru pendiau nya kena Hari Enam.

“Kitai deka bisi sebuah makmal kena 1 November lalu projek tu udah disengkaum dalam Program Trans- formasyen Menua Pesisir (RTP) aku ungkup taun tu.

“Jalai ngagai Song enggau Kapit deka tembu enda lama agi, nya kebauh endang patut bisi lurung pejalai digaga ditu,” ku iya nambah.

Dulu ari nya, chairman pengatur, Tuai Rumah Ron Ugai madahka Komiti Pemansang Enggau Pengelikun Genturung Pendiau (JKKK) Nanga Ngungun irauka pengelikun bala nembiak mit ti bedarat ninting hari nengah tisi jalai ba pengentap baru pendiau nurun sekula.

“Makin mayuh entukar nengah jalai diatu, kelebih agi sida ari Song enggau Kapit ti ngelawa Sibu tauka pejalai bukai pengudah Jematan kanowit ulih ditengah mensia mayuh taun nyin tadi,” ku iya.

Jalai tu ke amat sebagi ari Jalai Kapit/ Song/ Kanowit tang perintah udah mutuska penemu ngaga jalai muntang pengudah berundingka pekara pengelikun peranak rumah panjai ba pengentap baru pendiau nya.

Ron udah nya mantaika peminta peranak rumah panjai dia ngembuan jalai ti meruan ngelawa pendam ungkup komuniti pengentap baru pendiau.

Antara bala bisi datai Pemesai Pelilih Kanowit Kathreen Eddie Saga, Ketuai Polis Kanowit DSP Daniel Benjamin, Penghulu Juni Masam enggau Kunsil Pelilih Kanowit Kaunsilor Lakun Laga.

Alexander mega bisi ngemendarka belanja penyampau RM20,000 ngagai JKKK Nanga Ngungun beserimbai enggau pengawa sehari nya.