PDP Opar nyukung Henry ngetanka penuduk ba sitak Tasik Biru

KUCHING: Dato Henry Harry Jinep ( gambar) nerima sukung ari Parti Demokratik Progresif ( PDP) Bagi Menua Opar ngetanka penuduk Tasik Biru ba pengawa bepilih nengeri ti ditimpuh dua tauka tiga taun agi.

Sukung udah dipadah nyadi siti ari resolusyen disetuju PDP Bagi Menua Opis ba Aum Besai Tiga Taun Sekali ( TGM) diatur kena 7 Oktober tu tadi. Salin resolusyen udah bisi diberi ngagai media kemari.

Opar enggau Tasik Biru iya nya penuduk sitak nengeri besepiak ti nempa sitak parlimen Mas Gading.

Henry menang di Tasik Biru lebuh iya bediri minta pilih ba pengawa bepilih nengeri 2016. Iya mega menang darat nyadi Chairman PDP Tasik Biru maya TGM sida mega diatur kena 7 Oktober lalu nerima sukung ari bagi menua nya ungkup pangku pengawa sapit presiden.

Kelimpah ari nya, resolusyen bukai ti dikemendarka PDP Opar nyengkaum minta bala ketuai parti ngambi ngangkatka siku sektretari politik ngagai kepala menteri, ngambi dipadu gawa, datai ari kaban Mas Gading.

PDP Opar mega mutuska presiden parti, Dato Sri Tiong King Sing, enda dikerebut maya Gempuru Besai Tiga Tau Sekali ( TGA), deka diatur kena 15 ngagai 16 November di Bintulu.

Bala sida mega minta indu opis parti nyendiaka agih belanja ngagai bagi menua parti ba sitak ti enda diarika sebarang kaban kunsil nengeri tauka kaban parlimen ari PDP.

Sida mega minta ketuai nembiak enggau ketuai indu parti ngatur pejalai ngelawa tetiap bagi menua parti ngambi beratika mayuh agi pasal penang- gul ditapi raban renggat baruh.

Siku kunteriktor ari Bokah, Joseph Tau Katip udah dipilih nyadi chairman baru PDP Opar maya atur TGM. Sapit Chairman, Henry Simon Rimau, seraya ketuai pampang seksyen indu enggau seksyen nembiak, iya nya Melin Aban enggau Paulpot Sicol.