Tujuh buah rumah ba Kampung Pisang angus lengis
BINTULU: Sida 18 iku ari tujuh ruang bilik semina tinggal gari ba punggung pengudah rumah sida Kampung Pisang, Jalai Pesisir Pantai Bintulu-Miri, angus ba penusah nyadi urung pukul 6.40 lemai, Hari Minggu tu tadi.
Ketuai Opis Bomba enggau Penyah Penusah Bintulu, Mohamad Meramit lebuhka dirandau ngenukuka pekara nya, pengudah nerima kangau pasal penusah nya, iya ngerah 13 iku raban sida ngena dua kereban pengangkut ngerara api ngesah endur penusah nyadi sereta ngerara api.
“Lebuhka datai dia, raban kami meda api benung mau nganguska semua tujuh buah rumah ti dientak semak enggau pangan diri,” ku iya.
Ku iya, raban bomba ngena bekal ai ari tangki opis bomba dikena ngerara api laban menua nya nadai paip bomba sereta nadai pemansut ai tebuka.
“Kami matak 20 gulung hos dikena manchit ai ngagai endur penusah laban kereban pengangkut bomba enda ulih nengah jalai mit enggau luchak laban hari ujan bangat mangka endur nya,” ku iya.
Raban bomba ku iya, nyauka sejam timpuh ngerara api lalu api mujur dirara urung pukul 7.15 malam.
Nitih ku penerang, siku indu bakal ba penusah nya lalu udah ditabanka sida sebilik ngagai Sepital Bintulu, ngambika perubat.
Ku iya, pansik silik deka dipejalai ngambika nemu berapa penyampau pengerugi enggau pun penusah nyadi.
Semua sida ti tasah tu diau ngenduh ba rumah kaban belayan ti besemak seraya nganti rumah baru tembu digaga.