Asil pansik bekaul utai tanam asal tau dikomersial Kitai ngarapka ulih berengkah enggau ISCIC 2018 juluk nya ulih dikemansang sereta dikemujurka, ku Manyin
KUCHING: Asil aum enggau pansik ke dipejalaika raban pemansik tauka universiti patut ulih dikemansang sereta dikomersial kelebih agi bekaul enggau utai tanam asal nengeri tu.
Menteri Pelajar, Sains enggau Pemansik Teknologi, Dato Sri Michael Manyin Jawong madahka asil aum enggau pansik ke dipejalaika nya ukai patut semina ba atas keretas aja tang patut ulih dikemansangka.
“Mayuh pekara ke patut kitai pejalaika nengah aum enggau pengawa mansik, laban kitai pechaya asil pansik nya enda chukup enti semina ba atas keretas aja.
“Kemaya hari tu mayuh universiti ngeluarka belanja bejalaika pengawa mansik sereta bisi semina deka ngulihka Phd, tang ukai ke tuju ke ulih dikomersial.
“Nya alai nengah opis menteri enggau kerejasama kita ( pemansik) lalu pengujung ( asil pansik) ulih dikomersial. Kitai ngarapka ulih berengkah enggau International Scientific Conference on Indigenous Crops 2018 (ISCIC 2018),” ku iya.
Manyin mansutka pekara nya lebuh bejaku seraya bejadika ISCIC 2018 ti diatur Universiti Putra Malaysia Kampus Bintulu (UPMKB) sereta disukung Opis Menteri Pelajar, Sains enggau Pansik Teknologi ba sebuah hotel ditu, kemari.
Aum besai ti keterubah bekaul enggau utai tumbuh asal diatur dua hari ti tembu sehari tu ke ngena rambai jaku ‘Potential Indigenouse Plants for Commercialization’.
Berebak enggau tu iya ngarapka nengah aum besai nya ukai semina ulih tetemuka rega perubat ti bisi potensial ari semua utai tanam asal tang patut nyengkaum rega pemakai ti yau didagang tauka dijual baka dabai, terung masam enggau ke bukai.
Kebuah pia ku iya, laban perintah nengah Opis Menteri Betanam betupi Moden, Tanah Adat enggau Pemansang Kandang menua deka nyendiaka pemakai ti chukup lebuh manggai ba taun 2030.
“Mayuh utai tanam tauka utai tumbuh di babas ke bisi rega perubat, rega pemakai enggau ke bukai.
“Baka dabai iya nya bisi rega,dulu suba nya semina utai tanam sereta semina berega RM3 sekilogram tang sehari rega sekilogram iya nya RM30 laban mensia mayuh arap bendar nya bisi rega ti tau nyadika ubat sereta nyamai diempa ke ngujungka chukup tebilang.
“Pia mega terusng asam tauka terung dayak, suba enda dikelala tauka enda tebilang tang diatu laban nyamai sereta udah tebilang ngujungka rega pan nyau nyadi mar,” ku iya.
Bekaul enggau pekara nya Manyin ngarapka opis menteri iya ulih nempa kerejasama enggau opis menteri betanam betupi dikena ngayanka bukti laban enti semina bejaku aja nadai meri asil.
Tang enti pansik dipejalaika sereta bisi bukti madahka nya manah dikena berubat, manah dempa,nadai meri pengirau sereta ba pengujung iya orang arap sereta deka meli produk kitai, ku iya.
Sama bisi datai ba pengerami nya kemari Menteri Muda Pelajar enggau Pemansik Teknologi Dr Annuar Rapaee; Direktor UPMKB Professor Dr. Bujang Kim Huat; Chairlady ISCIC 2018 Professor Dr. Patricia King Jie Huang enggau ke bukai.
Mayuh pekara ke patut kitai pejalaika nengah aum enggau pengawa mansik, laban kitai pechaya asil pansik nya enda chukup enti semina ba atas keretas aja. Dato Sri Michael Manyin Jawong Menteri Pelajar, Sains enggau Pemansik Teknologi