Pemujur SMK Saint Anthony ngatur ‘SAS Got Talent’ dipuji
SARIKEI: Kaban Kunsil Nengeri Meradong, Datuk Ding Kuong Hiing muji SMK St. Anthony laban udah mujur keterubah endar ngatur ’reality show’ kena Hari Enam nyin tadi.
Ding ti mega dikangau bejadi ‘SAS Got Talent’ pechaya nya udah nyendiaka bala nembiak sekula nya pelasar endur mantaika pengelandik sida.
Iya beratika pengelandik ti dipandang nya nyadi pengelebih tambah ngagai aktiviti ko-kurikulum ke udah digaga nyadi sebagi ari pakej pelajar nembiak, ku Ding.
Iya arapka apai indai enggau pengajar ulih meransang bala nembiak ngemansangka pengelandik sida, ku Ding seraya madahka nya udah tentu deka disempulang enggau penyulut sida ba pelajar.
Sepenemu enggau Ding, chairperson Gerempung Apai Indai enggau Pengajar, Maureen Chua pechaya nengah nyereta pemandang nya, bala nembiak nimba peneleba ke berega, siti ari pekara ti ulih negapka tikas pengandal ati sida.
Prinsipal sekula nya, Vincent Liong ke mega sama bisi bejaku madahka entara batang tuju program nya dikena nyendiaka bala nembiak napi pengerami penumbuh ke-88 sekula nya ti diatur urung bulan Mac taun baru.
Berebak enggau nya, pemenang ari lumur Satu ngagai lumur Tiga ba pekit belagu udah dimenang Hannah Chieng enggau Lajoel, Loritta enggau Sharlina sereta Shukri.
Raban Betanda Melayu, Tanda China enggau Ngajat udah detatapka ba penuduk champion, kedua enggau ketiga lalu pemenang lumur satu ngagau ketiga ba tanda moden udah dimenang Luqman, 5A1 Dancers enggau Tim Bicara Berirama.
Sepenyampau 38 udah ngerejista diri masuk ba ketetiga kategori nya.