Program Sadia-Apan ngiri chara belajar ti engkeman
BETONG: Sekolah Menengah Kebangsaan (SMK) St Augustine iya nya sekula ti keterubah endur Sadia-Krian bejalaika Program SadiaApan, ti dipasuk urung 37 iku nembiak, apin lama.
Nitihku Chairman SadiaKrian Andrew Paul taja pan program nya diatur sehari tang mayuh penemu ke diterima lebih agi pasal runding sereta ulah ke ulih mai pemujur tauka penyulut sereta pekara ke ulih mai penanggul lalu ngeruga pelajar.
Asil program ke diatur nya ku iya, nembiak ngayanka pengagit ati ketegal ke udah nemu pemesai kuasa untak ke dikembuan diri sereta nemu baka ni chara untak sesiku gawa (Brain Capacity and Working Methodology).
“Nengah program tu aku ngasaika bala nembiak bisi endar pengerindu deka nemu chara belajar ti engkeman.
“Berindik ari pekara tu, ba program ke dudi ila, kitai ulih magi mayuh agi jam awakka bisi dikena kitai nekanka penemu tu,” ku Andrew.
Program Sadia-Apan iya nya sebengkah program endur meri runding ngagai raban nembiak pasal penanggul enggau pemujur ke udah ditemu orang ba pengawa sekula nyengkaum bekunsi chara belajar ti engkeman baka SQ3R enggau ke bukai.
Nambahka nya, lebuh ke bejaku ba pengawa nutup program nya, Pengajar Linton Masing beterima kasih ngagai Sadia-Apan ke udah datai ngagai sekula nya lalu bekunsi penemu ba pengawa sekula sereta nanam penemu chara berunding (Cognitive & Metacognitive) maya belajar.
“Ngarapka nembiak tauka prsereta program tu ulih bekunsi enggau sida ke bukai lebih agi maya belajar ngatika diri,” ku iya seraya beterima kasih ngagai orang ti gerah jari melanja program nya sereta ngarapka ulih dipejalaika baru jemah ila.
Kelimpah ari sekeda nembiak ke bisi nyereta program nya bepenemu program nya patut diatur ninting taun ke pemanah enggau penguntung nembiak bukai jemah ila.
Johnison Benneth, Erika Lika enggau Michelle Majang sepenemu madahka Program Sadia- Apan nya chukup manah sereta senipak enggau semua nembiak enda ngira renggat umur.
“Program tu kebendar chukup manah, lalu enti ulih patut dikunsi enggau semua nembiak enda ngira umur awakka sama meretika chara belajar ke engkeman.
“Program tu cukup manah dikena meransang bala nembiak lalu enda patut dipejalaika tiap taun awakka nembiak kemaya hari tu ulih terus mansang ba pengawa sekula,” ku sida tiga ti sepenemu pasal program nya seraya madahka bulih penemu baru ari program nya.
Nambahka nya, Deyrellene Ninny, Pauline enggau Velyntina madahka diri bulih mayuh penemu ke lebih agi pasal untak, runding, chara belajar ti betul, chara meri peransang ngagai diri sereta bulih tips belaja tauka ngingatka utai ke dipejalar enggau jampat.