100 iku peranak Rumah Unsa Bakar irau tanah tusur majak nyadi
LUBOK ANTU: Berindik ari penusah tanah tusur ti nyadi ba Rumah Panjai Unsa Bakar, Lemanak, Lubok Antu kena Hari Minggu tu tadi, 100 iku peranak rumah nya agi mengkang nangi penusah nya deka nyadi baru laban bekau tanah tusur nya makin ulih dipeda sereta udah ngujungka pengerusak nyadi ba sekeda endur di rumah panjai nya ti ngembuan 24 pintu bilik.
Pemesai Operasyen Opis Bomba enggau Penyelamat (BBP) Betong PBK 1 Henry Jugah madahka piak sida sekali agi dipadahka bekaul tanah tusur di genturung pendiau nya.
“Kami nerima ripot bekaul enggau kes nya urung pukul 2.18 lemai kemari lalu terus matau ke genturung pendiau nya begulai enggau raban bomba ke bukai.
“Sepengudah datai di genturung pendiau nya kami meda tanah bisi tusur muakka mua rumah nya kira-kira 4 kaki penalam enggau 100 kaki pemanjai lalu penyauh ari rumah iya nya semina 10 kaki aja.
“Bisi dipeda merekah ba dinding ruai rumah panjai nya ari rumah lumur tiga nyentuk lumur enam.
“Lalu muakka belakang rumah ti belumur 10 enggau 11 mega udah bisi kena tinggang tusur tanah bukit nya,” ku iya.
Iya madah munyi nya lebuh ti meri penerang sentang gaya tanah tusur di rumah panjai Unsa Bakar, Lemanak, Lubok Antu ti udah berengkah nyadi kenyau ari ensana.
Henry mega minta peranak rumah panjai nya nutup tanah dia enggau kimbis lalu minta raban Opis Kereja Raya (JKR) Bagi Menua Sri Aman ngambika mutarka penanggul nya enggau lengkas.
Iya mega udah minta tuai rumah ngambika betelefon ngagai JKR nyema tanah tusur nya agi terus nyadi.
Beserimbai enggau nya, penusah tanah tusur nya nyadi ketegal ujan bangat ti enda ngetu ke udah nyadi ba kandang menua nya kenyau ari pukul 8 lemai Hari Enam nyentukka tumu pagi Hari Minggu.
Taja pia, penusah tanah tusur nya berengkah nyadi urung pukul 2 dinihari Hari Minggu ti ngujungka peranak rumah panjai nya nangi sereta takut.