DAP Sarawak deka ngatur konvensyen renggat nengeri kena 4 November tu
MIRI: Parti Tindakan Demokratik (DAP) Nengeri deka ngatur konvensyen renggat nengeri kena 4 November ti deka datai di Kuching.
Skretari DAP Sarawak Senator Alan Ling madah, konvensyen nya gempuru parti nya ti keterubah diatur, sepengudah parti nya begulai enggau perintah Pakatan Harapan (PH) megai perintah menua tu kenyau ari 9 Mei tu tadi.
Alan madah tema konvensyen taun tu iya nya bekaul enggau pengawa bepilih nengeri (PRN) ti deka datai dua taun agi, nyengkaum pelin enggau langkar kereja bekaul pengawa nya.
“Kami deka madahka tema konvenseyen tu nyema nyau dampih enggau haribulan nya ila,” ku iya madah ngagai Utusan Borneo ditu kemari.
Ku Alan madah enggau silik, sida enda nyangka sambut ti manah ba konvensyen nya berindik ari kaban parti nyentukka renggat baruh udah ngayanka pengandal ati sida deka sama negi sereta nyukung ubah ti digaga sepengudah PH menang ba renggat perintah besai.
“Tu endang juluk kitai kenyau ari suba, nyimpan pengingin sereta pengandal bejalaika polisi ti manah agi ungkup Sarawak lalu PH Sarawak ulih mai ubah nya, tu ulih ngubah pemutus ( pemenang ungkup PH) maya PRN ti deka datai,” ku iya nandu.
Kitai endang udah nemu Sarawak begunaka perintah nengeri ke baru enggau lengkas dikena ngatur sistem merintah ti lurus enggau saup kaban ti enda bechiping.
“Siti chunto pemanah ati PH iya nya begempung enggau lengkas meri buah penemu sentang Artikel 1 (2) Perlembagaan Persekutuan, dikena negika status khas Sabah enggau Sarawak, muka jalai nentuka kededua nengeri tu teulihka hak autonomi,” ku iya nambah.
Nitih ku Alan, konvensyen nya ila nyangka deka dipenyadi Sekretari Besai DAP ke mega Menteri Wang Lim Guan Eng (pukul 10 pagi) kena 4 November 2018 di Crown Square ti deka ngayanka pengawa bepilih ketuai renggat parti DAP Nengeri ke baru enggau 100 iku pengari ari mayuh pampang di selampur nengeri tu. SIBU: Sibu Kidney Foundation (SKF) udah ngatur randau ‘ Sayauka Tungkul Sengayuh Kitai’ ba Sekula Primari China (SJKC) Chung Sing ditu kemari.
Bisi 160 iku nembiak sekula primari enam udah datai ngulu randau tu.
SKF suah ngatur randau tu ungkup nembiak sekula primari enam ba sekula ninting taun.
“Kitai dekaka nembiak nemu mayuh agi bekaul enggau penyakit tungkul sengay- uh, sereta chara ti engkeman dikena nyeliahka penyakit enggau bakani chara ngubat penyakit nya,” ku penerang ti diterima ari SKF.
Randau ti sebaka mega diatur minggu ti deka datai ba SJKC Thai Kwang.