Empat universiti deka besaup ngemansangka ekosistem IOT di Sarawak

KUCHING: Swinburne University of Technology Kampus Sarawak sehari tu udah nyain Sempekat ( MoA) enggau tiga universiti bukai besaup bejalaika pansik sereta bejalaika projek ekosistem Internet Benda ( IoT).

Tuju nya deka numbuhka ‘ bandar raya bestari’ di Sarawak, lalu projek nya mega ngaul Curtin Malaysia, Universiti Malaysia Sarawak (UNIMAS) enggau Universiti Teknologi Mara ( UiTM) Kampus Sarawak.

Pengawa nyain MoA nya sebagi ari Program Penyedar Industri 4.0 pengelama tiga hari berengkah kemari di kampus Swinburne ditu.

Pengawa nyain MoA nyan udah dikemata Sapit Kepala Menteri Sarawak Datuk Amar Awang Tengah Ali Hasan, ke mega Menteri Pemansang Industri enggau Orang Dagang,ke mega Menteri Pemansang Mengeri enggau Pengeraja Asal Kedua sereta Menteri Muda Pemansang Industri, Malcolm Mussen Lamoh.

MoA nya ngerintaika garis kaul empat universiti tebilang di Sarawak nya ngambika ngelangkar, ngaga sereta ngena ekosistem IoT minimum di sesebuah mengeri ke bisi diatu nengah chara ngena komponen ungkus murah ke bisi diatu.

Lebuh ke bejaku, Awang Tengah madah nyadika kelai sebagi ari langkar kuing ekonomi digital, Sarawak meseti ngena memanah Revolusyen Industri Keempat ( IR4.0) dikena ngangkatka pengulih besemekih nengeri tu dalam sektor begaga.

Ku iya, Sarawak enda ulih majak bepanggai ba perambu enggau teknologi ungkus murah ti bepelasarka pengereja pengawa dikena nyapai pemansang ekonomi.

“Ekonomi digital sebengkah jeman krativiti enggau inovasyen lalu tu mih ke dikumbai IR4.0,” ku iya.

Ku Awang Tengah, ngambika ulih jampat nyingkang nuju Industri 4.0, Sarawak meseti meri timbal positif ngagai ubah ngambika nengeri tu enda tinggal.

Berebak enggau nya, biya meransang semua rayat Sarawak, kelebih agi indutri mit enggau jelan pemesai ( SME, ngambi singkang berani nuju Industri 4.0, regas ngaul diri sereta meri sukung ngambika Sarawak ulih nyadi sebuah negeri ke lebih dinamik sereta tegap ari sukut ekonomi. — Bernama