Utai tumbuh asal deka dikemansang, ku Dr Bujang
Laban utai tumbuh asal nya mayuh guna ba pengawa berubat enggau pemakai ti tau nyadi penatai pemisi
KUCHING: Potensial utai tumbuh asal ba pemesai reti pengawa berubat enggau pemakai nyadika pelasar sereta inisiatif Universiti Putra Malaysia Kampus Bintulu (UPMKB) enggau sukung ari Opis Menteri Pelajar, Sains enggau Pemansik Teknologi ngatur aum besai keterubah bekaul enggau utai tumbuh asal.
Direktor UPMKB Profesor Dr. Bujang Kim Huat madahka,inisiatif nya dipejalaika enggau sukung ari Opis Menteri Pelajar, Sains enggau Pansik Teknologi ti ngembuan juluk ngemansangka utai tumbuh asal ketegal pengelikun pemakai, pemansut utai tanam kelimpah ari ti ulih nempa penatai pemisi.
Nitihku iya, utai tumbuh asal udah dieksploitasi sekeda peranak etnik enggau asal ngena chara asal maya ngasu lalu ngelala utai tumbuh nya ulih diempa.
“Laban ti nemu pemesai guna ( utai tumbuh asal), UPMKB ngambi inisiatif ngatur aum besai keterubah pasal utai tumbuh asal ba Sarawak, ti ngena rambai jaku ‘Potential Indigenous Plants for Commercialization’.
Laban ti nemu pemesai guna (utai tumbuh asal), UPMKB ngambi inisiatif ngatur aum besai keterubah pasal utai tumbuh asal ba Sarawak, ti ngena rambai jaku ‘Potential Indigenous Plants for Commercialization. Profesor Dr. Bujang Kim Huat Direktor Universiti Putra Malaysia Kampus Bintulu
“Tuju aum besai tu diatur laban deka nerangka utai tumbuh asal ke ulih ditanam sereta diketau ke lalu meri penguntung enggau gaya pengidup, nyendiaka pelasar ngagai semua orang ke bisi pemerat bekunsi penemu pasal utai tanam asal enggau ngelakuka rentayan entara orang ke bisi pemerat pasal pemansang utai tanam asal tu,” ku iya.
Bujang mansutka pekara nya dalam jaku pengelalu ba pengerami bejadika ISCIC 2018 ke diatur ba sebuah hotel ditu, kemari.
ISCIC 2018 ti keterubah diatur dipenyadika Menteri Pelajar, Sains enggau Pemansik Teknologi Dato Sri Michael Manyin Jawong,lalu sama bisi digulu Menteri Muda Sains enggau Pemansik Teknologi, Dr Annuar Rapaee.
Bisi 22 iku speaker tauka orang ti dikanggauka bejaku lalu bekunsi chara mansik enggau penemu ti pemadu baru, sereta betukar penemu tauka runding entara raban pemansik, kaban akademik enggau nembiak dalam bi- dang utai tumbuh asal.
Nambahka nya Bujang madahka UPMKB aja bisi urung 60 iku pemansik sereta mekuh dalam pengawa pemansik pasal betanam betupi, kampung, kuasa tau dikena baru, sosio-ekonomi enggau industri kimia kelimpah ari bisi juluk deka ngemansangka utai tumbuh asal.
“UPMKB bebendar deka ngerembaika penemu pasal utai tumbuh asal ti ulih dikelaku sereta dikemansang ke lalu meri penguntung ngagai mensia enggau rampa menua.
“Intelektual enggau rentayan tu deka meransang kaul entara UPMKB enggau institut pemansik, ejensi perintah enggau industri,” ku iya.
dipelabaka urung 200 iku pesereta antarabansa enggau menua tu ti nyengkaum raban pemansik, kaban akademik enggau nembiak.
Sama bisi datai ba pengawa nya kemari, chairperson ISCIC 2018 Associate Proffesor Dr. Patricia King Jie Hung enggau ke bukai.