Program International Summer School 2018 deka diatur kena 20 Okt - 4 Nov
BINTULU: Program International Summer School 2018 deka diatur pengelama dua minggu ba Universiti Putra Malaysia Kampus Bintulu (UPMKB) berengkah ari 20 Oktober nyentuk 4 November.
Program tu diatur begulai UPMKB enggau Opis Kepala Menteri Sarawak (Integriti enggau Ombudsman).
Penyereta dibuka ngagai sebarang nembiak antarabansa ti belajar di menua luar tauka sebarang universiti menua tu.
Koordinator sekretariat program, Fakhzan Buang madahka tu siti ari program kasual ti ukai bepelasarka peresa akademikti dipejalai dalam timpuh dua ngagai empat minggu bepanggai ba modul enggau pakej program.
“Program Summer School diperati nyadi medium belajar nengah peneleba daya idup, aktiviti pemansang nembiak, betukar akademik sereta mega worksyop ti fokus ba siti ‘soft skills’ aja.
“Ke amat, program ninting taun tu dilangkar dikena nambahka kualiti atmosfera belajar antarabansa enggau pemansang ba pansik ti ditukuka dunya,” ku iya.
Ku iya nambah, penyereta ari nembiak antaraban ngagai ‘program Summer School’ mega ulih nambahka penuduk universiti sida sereta nempa mayuh kerejasama ba mayuuh bengkah bidang ari pakar.
Seriris enggau motto ‘Diversity in Academia, Culture & Agriculture’, ku Fakhzan program ngemai kelala mayuh macham pekara budaya, akademia enggau pengelandik nyadi ketuai nengah aktiviti ti nyengkaum penemuai akademik, workshop enggau forum ti meransang kereja tim antara bala penyereta sereta meri sida ngasaika pengaya budaya.
Program tu mega dikena ngelakuka UPM ngagai antarabansa laban tu deka ngaul bala penyereta ari menua bukai.
“Batang tuju International Summer School 2018 deka nambahka kaul kerejasama antara universiti ba Borneo, ngemansang pengelandik nyadi ketuai antara bala penyereta, ngelakuka tradisi enggau budaya Sarawak sereta meransang bala penyereta chakah ngaul diri ba aktiviti ngemai pemaik,” ku iya.
Nitih ku iya, sepanjai program tu, penyereta deka dibai ngelala pesaka budaya Sarawak, deka dibai ngelala mayuh bengkah prospek enggau pekara ba kereja enggau budaya, diperansang numbuhka rentayan enggau kolaborasyen ti deka nempa enggau negika budaya, pansik enggau betukarka penau, sereta deka diembing nyadi teladan ngagai raban nembiak.
Bisi beberapa penguntung timpuh pandak enggau panjai ari program tu ngagai bala penyereta enggau UPMKB.
“Program tu nyendiaka pelasar ungkup UPMKB ngerembaika penemu pasal betanam betupi, berebak enggau nya, ngemai kelala budaya enggau gaya idup asal bala komuniti ba Sarawak ngagai dunya,” ku Fakhzan
Tambah mega ku iya, penyereta program deka belajarka ngemeranka pengawa be- tanam betupi enggau aktiviti ekonomi peranak Sarawak lalu sida mega deka ngasaika budaya enggau pesaka asal ti berega ba tubuh sida empu.
Aktiviti dilanggur ungkup International Summer School 2018, ku iya, mega dilangkar dikena ngajar pengelandik baru enggau spesifik, nempa pengandal diri, nyeridi pengelandik nyadi ketuai enggau niali, nambahka pengelandik ngaga pemutus, ngelakuka pengawa dagang, meransang komunikasyen dunya, sereta meransang kolabarasyen antara bala penyereta.
Program tu mega deka ngemai kelala UPMKB nyadi palan pemadu deka ditapat ungkup belajar postgraduate sereta matak pelajar ti bepenau ari serata dunya.
“Ba timpuh panjai, tu deka nempa siti kampus ti pemadu mayuh ditapat ungkup pelajar tinggi di wilayah Asia sereta siti ari institusyen penuduk ti manah belajar tinggi ba sukut bulih kereja,” ku Fakhzan.
Penerang silik, tau betanya ngagai ketuai sekretariat carolyne@upm.edu.my tauak at 086-855 289.