Penau enggau pengelandik ngaga sugu tinggi ulih nyungkak penatai pemisi
KUCHING: Penau enggau pengelandik asil jari ngaga sugu tinggi ulih mantu nambah sereta nyungkakka belanja ruang bilik, enti dikemeran sereta dikemeratka.
Berindik ari pekara nya Akademi Sarakup Dayak Iban Sarawak (ASADIA) ti diketuaika Mabong Unggang berengkah ngatur kelas ngaga sugu tinggi iya nya sebengkah ari perengka ngepan asal indu Iban.
Kelimpah ari nya, tuju kelas tu ditumbuhka laban deka ngangkat sereta ngetanka perengka ngepan asal indu Iban, ku Mabong.
“Tuju kami (ASADIA) ngatur kelas belajar ngaga sugu tinggi tu laban deka ke perengka ngepan asal bansa indu kitai Iban terus pegari sereta chara ngaga ulih ditampung rebak baru enggau dudi.
“Tu mega sebengkah ari chara kami (ASADIA) mantu bala pesereta ngiga belanja iya nya sida belajar sereta enti udah landik bendar asil sugu tinggi ke digaga ulih dijual dikena nambahka penatai pemisi, kelimpah ari ti kena ngetanka kereban asal diri.
“Enggau pengelandik ke dikembuan diri empu lebih agi sida indu ke enggau masuk kelas tu udah tu ila ulih ngaga kediri sereta enda bepanggai tauka bebeli baka sugu tinggi nya ari menua bukai,” ku iya madah ngagai Utusan Borneo.
Kelas nya diajar ulih Annie iya nya siku orang ti chukup bepengelandika pasal main asal enggau ngepan Iban.
Nitihku Mabong, berindik ari sukung sereta peminta ba kelas tu nerima peransang ke chukup manah ASADIA beperambu deka ngatur kelas ke sama ba taun baru.
Kelimpah ari nya, Presiden Sarakup Dayak Iban Sarawak (SADIA) Sidi Munan lebuh ke sama datai ngemataka pengawa belajar ngaga sugu tinggi ngelalau pesereta madahka nadai pengerugi belajarka chara ngaga ngepan asal Iban baka sugu tinggi nya.
Sidi mega bepenemu asil ari pengelandik ngaga sugu tinggi nya mega ulih mantu nyungkakka penatai pemisi ruang bilik.
“Kita patut ngatur penemuai sereta belajarka chara ngaga sugu tinggi di menua Kalimantan.
“Ba menua Kalimantan sida ulih ngaga sugu tinggi ngena perak ke lalu nyadi siti industri ke ulih nyungkakka penatai pemisi,” ku Sidi.
Sebarang penerang tauka tanya bekaul enggau kelas tu tau ditanya ngagai Mabong ba lumur 012-6925562.