Brigedier Jeneral Johnny Lim dichiri nyadi Panglima Briged Ke-31 Infantri
SIBU: Brigedier Jeneral Johnny Lim Eng Seng dichiri nyadi Panglima Briged Ke-31 Infantri nganti Mejar Jeneral Dato’ Fadzil Tajuddin ti deka pinchin enda lama agi.
Pengawa nerima penuduk nya dikemataka Panglima 1 Divisyen Mejar Jeneral Dato’ Toh Choon Siang ba Padang Kawad Kem Junaco ditu, kemari.
Kelimpah ari nya, 21 iku pemesai enggau 220 Angota Lain- Lain Pangkat ( LLP) ngulu pengawa bebaris maya nya.
Fadzil ba jaku iya madah, timpuh ari 4 Januari 2017 nyadi Panglima 31 Briged Infantri mai reti ke besai ba pengidup iya.
“Aku enda nyalam ba timpuh ke serekat nya nadai mayuh pekara ulih dipenyadi dikena ngangkatka tikas Briged RS( Rejimen Sempadan) baik nya ari penyampau tubuh, logistik tauka pengelantang raban enggau sida sebilik.
“Tang aku temegah ati laban semua raban Briged tu mengkang besabar begulai enggau aku sereta bejalaika tanggung pengawa diri sereta ransing ngintu pemanah nama diri,” pia ku iya madah.
Fadzil mega ngarapka semua rban 31 Briged Infantri semampai bebasaka pemesai ke baru dikena nentuka sida seruran bulih pemujur.
“Pia mega enda ulih ditingkah 31 Briged udah mayuh bejalaika servis ngagai mensia mayuh di nengeri tu ngelama tu.
“Ari nya, ngarapka pengawa tu semampai ditanggam sereta disungakka agi,” ku iya madah baru.
Sama bela datai maya tu iya nya Direktor Kem Junaco Park, Kiu Siong Hii sereta bala bukai.