Nyema dikemendar di parlimen Sarawak enda ulih nitih laban bisi autonomi tambah mega konstitusyen deka diubah
KUCHING: Nitihka prinsipal, perambu natak timpuh servis dua penggal nyadi Menteri Besai (PM), Kepala Menteri (KM) enggau Menteri Besar (MB) endang manah, tang Sarawak bisi autonomi kediri empu, pia ku Kepala Menteri Datuk Patinggi Abang Johari Tun Openg.
Iya madah, nyema perambu nya dibantai sereta dikemendarka parlimen, Sarawak tetap enda ulih nitih, laban ke tuju nya konstitusyen nengeri deka diubah.
Iya mega madahka pekara nya enda ulih diputuska kediri tang begunaka penemu ari semua parti politik.
“Sarawak bisi autonomi. Sabah enggau Sarawak bisi autonomi.
“Enda ( dipejalaika ba Sarawak). (Nyema dikemeranka) Kitai patut ngubah konstitusyen kitai, laban kitai bisi autonomi. Lalu pekara tu mega patut dikerandauka enggau parti politik, ngulihka penemu sida dulu.
“Tang nitihka prinsipal dua penggal (nyadi PM, KM enggau MB) tu manah,” ku iya lebuh dikerandau pasal pekara nya, pengudah bejadika sebuah hotel butik ditu, kemari.
Di Kuala Lumpur, Menteri Besai Tun Dr Mahathir Mohamad lebuh bejuraika langgur pasal Pansik Setengah Penggal Atur Pemansang Malaysia Lumpar Ke- 11 ( RMK11) 2016- 2020, bisi madahka timpuh servis nyadi Menteri Besai (PM), Menteri Besar (MB) enggau Kepala Menteri (KM), deka ditatak dua penggal chara ti jampat dipejalaika dikena mai reformasyen dalam sistem politik.
Nambahka nyan lebuh ditanya bekaul enggau Pansik Setengah Penggal Atur Pemansang Malaysia Lumpar Ke-11 (RMK11) 2016-2020, kelebih agi bekaul enggau Sarawak, Abang Johari madahka langgur nya sama semina diubah baru, perintah baru.
“Bekaul enggau Sarawak, iya besemaya deka neruska perambu ungkup Sarawak enggau Sabah, lalu aku ngarapka nya amat dipejalaika laban diatu mayuh amat projek dikinsil,” ku iya.
Ditanya baru berapa mayuh projek di Sarawak ke dikinsil, iya madahka diri nadai penerang silik pasal projek ti dikinsil nya.
“Mayuh, kita (pengarang berita) lebih nemu ari aku. Di Betong kita nemu projek nya dikinsil lalu udah nya kitai bedau nemu baka ni gaya.
“Ke ditemu aku mayuh mega projek kena kinsil di menua pesisir,” ku iya.
Kelimpah ari nya, ditanya utai ke dikearapka ari Bajet 2019 ke deka dibantaika kena 2 November, Abang Johari enggau pandak nyaut;
“Aku ngarapka mayuh duit diberi ngagai Sarawak,” ku iya.