Elawin nya meseti diberi ngagai ketuai raban bansa ke dipilih rayat lalu ukai ngagai ketuai ti dipilih ketegal pekara politik
KUCHING: Perintah Besai Pakatan Harapan (PH) deka ngagihka RM35 juta ba taun 2019 ungkup Sarawak dikena mayar elawin ketuai raban bansa, ku Menteri Kereja Raya Baru Bian.
Tajapia iya madah elawin nya meseti diberi ngagai ketuai raban bansa ke dipilih rayat lalu ukai ngagai ketuai ti dipilih ketegal pekara politik.
“Kitai ngaga penetap, elawin diberi ngagai ketuai ke dipilih nengah adat ruai, iya nya ketuai pupu bansa meseti dipilih rayat.
“Kitai madah ngagai Perintah Negeri diak kitai semina nyukung ketuai ke dipilih nengah chara tu,” ku Baru.
Iya mansutka jaku nya lebuh dirandau pemberita ba penemuai kereja ngagai Akademi Binaan Malaysia (ABM) di Jalai Sultan Tengah ditu, kemari.
Baru nambah atur nyiri ketuai raban bansa ngelama tu bepelasarka orang ti nyukung Perintah Negeri.
“Kami nemu sentang pekara tu tang pengudah PH megai Perintah Besai, kitai mengkang deka mayar elawin lalu Sarawak diberi agih belanja RM35 juta ungkup tuju nya ba taun ti deka datai,” ku iya.
Ngenang sentang surat tesau ke dikeluar Opis Sekretari Negeri ti nagang raban ketuai raban bansa datai ngulu aum tauka program ke diatur Perintah Besai, Baru madah pekara nya enda adil.
Iya netapka ketuai raban bansa patut nyadi pengari komuniti tauka genturung pendiau alai surat tesau nya ngemuntan raban ketuai bejalaika tanggungpengawa sida.
“Enti sida ditagang betemu enggau raban ketuai ari Perintah Besai, genturung pendiau nya engka enda ampit ngasai program pemansang tauka bantu ke bisi disedia.
“Surat tesau nya nutup peluang sida ngenataika pinta enggau perambu pemansang,” ku Baru.
Kitai ngaga penetap, elawin diberi ngagai ketuai ke dipilih nengah adat ruai, iya nya ketuai pupu bansa meseti dipilih rayat. Baru Bian Menteri Kereja Raya