Nadai projek ti bekaul enggau Jalai Besai Pan Borneo dikinsil

KUCHING: Menteri Kereja Raya Baru Bian netapka nadai projek ke bekait enggau pengawa ngaga Jalai Besai Pan Borneo dikinsil di Sarawak enggau Sabah.

Ku iya, pengawa ngaga projek nya di kededua nengeri diatu dikereja enggau lanchar.

“Baka ke udah dipadah ngagai kitai, Projek Jalai Besai Pan Borneo dikereja enggau lanchar lalu disadang tembu nitihka timpuh ke udah ditetap.

“Opis Menteri Kereja Raya ( KKR) matau projek nya enggau silik ngambika projek tembu nitihka timpuh ke ditetap,” ku iya.

Iya mansutka jaku nya lebuh dirandau pemberita ba penemuai kereja ngagai Akademi Binaan Malaysia (ABM) di Jalai Sultan Tengah, Petra Jaya ditu, kemari.

Ensanus ba sebengkah program di Kuching, Kepala Menteri Datuk Patinggi Abang Johari Tun Openg bisi ngenataika pengirau alai mayuh projek besai ke udah dikemendar di Sarawak udah dikinsil Perintah Besai ke diatu.

Ngenang kaul ke sama, Baru madah engka bisi sekeda orang ti deka nginsil projek nya.

Tajapia iya madah keran deka nentuka projek nya dikemujur.

Nambahka nya, Baru madah KKR sedia berandau enggau piak ti bisi kaul enggau projek nya nyengkaum Perintah Negeri.

Dulu agi ari nya ba jaku rambau penemuai kereja nya, Baru muji pengeran CIDB enggau ABM Sarawak ba pengawa nempa raban pengereja pengawa bepengelandik tinggi di negeri tu.

Ku iya, pemujur ba pekara nya nyaup ngurangka penyampau pengereja pengawa ari menua luar ditu.

“Aku ngarap pengawa tu dipajakka berari ungkup pemansang bala nembiak di negeri tu,” ku Baru.